پنجاب پولیس کے زائد العمر (اوور ایج) گریجوایٹ کانسٹیبلز اور ہیڈ کانسٹیبلز کے لیے بڑی خوشخبری آگئی ہے۔
ترجمان پنجاب پولیس کے مطابق پی کیڈٹ سکیم کے تحت پبلک سروس کمیشن کے امتحان میں شامل ہونے کے لیے عمر کی حد میں 5 سال کی رعایت دی گئی ہے۔ اس فیصلے کے تحت سب انسپکٹرز اور اے ایس آئیز کی سیٹوں کے امتحان کے لیے عمر کی حد 35 سال سے بڑھا کر 40 سال کر دی گئی ہے۔ اس تبدیلی کا مقصد کرونا وبا اور دیگر عوامل کی وجہ سے زائد العمر ہونے والے ہزاروں کانسٹیبلز اور ہیڈ کانسٹیبلز کو فائدہ پہنچانا ہے۔
ترجمان نے بتایا کہ عمر کی حد میں اضافے سے ایک ہزار سے زائد کانسٹیبلز اور ہیڈ کانسٹیبلز ایس آئی اور اے ایس آئی کی سیٹوں کے لیے کوالیفائی کر سکیں گے۔ اس حوالے سے آئی جی پنجاب ڈاکٹر عثمان انور نے متاثرہ ملازمین کے مسائل کو سنجیدگی سے لیا اور سمری کیبنٹ کمیٹی کو ارسال کی۔
کیبنٹ کمیٹی کی منظوری کے بعد، یہ رعایت صرف ایک بار کے لیے دی گئی ہے، تاکہ زائد العمر کانسٹیبلری پی پی ایس سی امتحان میں حصہ لے سکیں۔ قبل ازیں، بالائی عمر کی حد 35 سال تھی، جس کی وجہ سے کرونا وبا کی وجہ سے ہزاروں پولیس ملازمین پروموشن امتحان کے لیے زائد العمر ہو گئے تھے۔
آئی جی پنجاب نے کانسٹیبلز کو ہدایت کی ہے کہ وہ اے ایس آئی اور سب انسپکٹر بننے کے لیے مقابلے کے امتحان کی تیاری کریں، جس کا انعقاد جلد ہونے والا ہے۔ اس اقدام کے بعد کانسٹیبلری میں خوشی کی لہر دوڑ گئی ہے۔
By 
