چاول اور دالوں کی قیمتوں میں کمی

لاہور کی ضلعی انتظامیہ نے نئے سرکاری نرخنامے کا اعلان کیا ہے جس کے تحت چاول اور مختلف دالوں کی قیمتوں میں کمی کی گئی ہے، تاہم دودھ کی قیمت میں اضافہ کیا گیا ہے۔

نئے نرخنامے کے مطابق باسمتی سپر (نیا) چاول کی ہول سیل قیمت میں 10 روپے کمی کے بعد 245 روپے فی کلو ہو گئی ہے، جب کہ پرچون قیمت بھی 10 روپے کم ہو کر 250 روپے فی کلو ہو گئی ہے۔ اسی طرح دالوں کی قیمتوں میں بھی مختلف سطحوں پر تبدیلیاں کی گئی ہیں۔

دال چنا (باریک) کی ہول سیل قیمت میں 5 روپے کا اضافہ ہوا ہے، جس کے بعد یہ 325 روپے فی کلو ہو گئی ہے، تاہم اس کی پرچون قیمت 330 روپے فی کلو پر برقرار ہے۔

دوسری طرف دال چنا (سپیشل) کی ہول سیل اور پرچون قیمتوں میں 5 روپے کی کمی کی گئی ہے، جس کے بعد ہول سیل قیمت 350 روپے اور پرچون قیمت 355 روپے فی کلو ہو گئی ہے۔

دال مسور (موٹی) امپورٹڈ کی قیمت میں بھی 5 روپے کی کمی کی گئی ہے، جس کے بعد ہول سیل قیمت 255 روپے اور پرچون قیمت 260 روپے فی کلو ہو گئی ہے۔

دال ماش (دھلی) امپورٹڈ کی ہول سیل قیمت میں 15 روپے کی کمی کی گئی ہے، اور یہ اب 480 روپے فی کلو ہو گئی ہے، جب کہ پرچون قیمت 490 روپے فی کلو ہو گئی ہے۔

دال ماش چھلکے والی (امپورٹڈ) کی قیمت میں بھی 15 روپے کی کمی ہوئی ہے اور یہ 440 روپے فی کلو ہو گئی ہے، جبکہ پرچون قیمت 445 روپے فی کلو ہو گئی ہے۔

دال مونگ (چھلکے والی) کی ہول سیل اور پرچون قیمت میں 50 روپے کا اضافہ کیا گیا ہے، اور یہ اب بالترتیب 335 اور 340 روپے فی کلو ہو گئی ہیں۔ اسی طرح کالا چنا (موٹا) لوکل اور کالا چنا (باریک) لوکل کی قیمتوں میں 5 روپے کی کمی کی گئی ہے اور یہ بالترتیب 335 اور 320 روپے فی کلو ہو گئی ہیں۔

دوسری جانب سفید چنا (موٹا) امپورٹڈ کی ہول سیل اور پرچون قیمتوں میں 20 روپے کی کمی کی گئی ہے، اور یہ اب 280 روپے اور 290 روپے فی کلو ہو گئی ہیں۔ بیسن کی قیمتوں میں کوئی تبدیلی نہیں کی گئی اور یہ ہول سیل قیمت 335 روپے اور پرچون قیمت 340 روپے فی کلو پر برقرار رکھی گئی ہیں۔

تاہم دودھ کی قیمت میں 10 روپے کا اضافہ کیا گیا ہے اور اب دودھ کی قیمت 170 روپے فی لیٹر ہو گئی ہے۔ گوشت کی قیمتوں میں بھی کوئی تبدیلی نہیں کی گئی اور چھوٹا گوشت ہڈی والا 1600 روپے فی کلو جبکہ بڑا گوشت ہڈی والا 800 روپے فی کلو پر برقرار رکھا گیا ہے۔

نئے نرخنامے کے مطابق چاول اور دالوں کی قیمتوں میں کمی کا فائدہ صارفین کو پہنچے گا، مگر دودھ کی قیمت میں اضافے سے کچھ مشکلات کا سامنا ہو سکتا ہے۔