پاکستان اور چین کے تعلقات باہمی اعتماد اور تعاون پر مبنی ہیں، آرمی چیف

آرمی چیف جنرل عاصم منیر نے کہا ہے کہ پاکستان اور چین کے تعلقات باہمی اعتماد اور تعاون کی بنیاد پر استوار ہیں۔

پاک فوج کے شعبہ تعلقات عامہ (آئی ایس پی آر) کے مطابق چین کے سینٹرل ملٹری کمیشن کے وائس چیئرمین جنرل ژانگ یوشیا نے ایک اعلیٰ سطحی وفد کے ہمراہ جنرل ہیڈ کوارٹرز (جی ایچ کیو) کا دورہ کیا۔ اس دوران جنرل ژانگ نے پہلے آرمی چیف جنرل عاصم منیر سے ون آن ون ملاقات کی، جس کے بعد وفود کی سطح پر مذاکرات کا سلسلہ جاری رہا۔

آئی ایس پی آر کے مطابق ملاقاتوں میں باہمی دلچسپی کے امور، علاقائی سلامتی اور دوطرفہ دفاعی تعاون کو مزید فروغ دینے پر تبادلہ خیال کیا گیا۔ جنرل عاصم منیر نے پاک چین تعلقات میں باہمی اعتماد اور تعاون کے مزید استحکام پر زور دیتے ہوئے کہا کہ دونوں ممالک کی دوستی مزید مستحکم ہو رہی ہے۔ انہوں نے پاک چین تعلقات کی پائیداری کو اجاگر کیا اور چینی قیادت کا شکریہ ادا کیا جو تمام حالات میں پاکستان کے ساتھ کھڑی رہی ہے۔

جنرل عاصم منیر نے کہا کہ پاکستان اور چین کے تعلقات مشکل حالات میں بھی باہمی اعتماد پر قائم رہے ہیں اور دونوں ممالک کے تعلقات وقت کے ساتھ مضبوط ہو رہے ہیں۔

اس موقع پر جنرل ژانگ یوشیا نے پاکستان کی ثابت قدمی اور سٹریٹجک شراکت داری کی تعریف کی اور چینی سینٹرل ملٹری کمیشن نے انسداد دہشت گردی کی کوششوں میں پاک فوج کی پیشہ ورانہ مہارت کو بھی سراہا۔

آئی ایس پی آر کے مطابق جی ایچ کیو پہنچنے پر جنرل ژانگ یوشیا نے یادگار شہداء پر پھولوں کی چادر چڑھائی اور چینی سینٹرل ملٹری کمیشن نے پاکستان کے شہداء کو خراج عقیدت پیش کیا۔