کوئٹہ: سرکاری گاڑیوں پر سابق وزرا، مشیروں اور بااثر افراد کا قبضہ

کوئٹہ: بلوچستان کے محکمہ سروسز اینڈ جنرل ایڈمنسٹریشن کی 38 گاڑیاں سابق نگران وزرا اور مشیروں کے پاس ہونے کا انکشاف ہوا ہے۔ جب کہ 5 گاڑیاں بااثر افراد کی ملکیت میں ہیں۔ یہ گاڑیاں کئی ماہ گزرنے کے باوجود واپس ۔نہیں کی جا سکیں

جیو نیوز کو موصول ہونے والی دستاویزات کے مطابق محکمہ سروسز اینڈ جنرل ایڈمنسٹریشن کے پاس مجموعی طور پر 527 گاڑیاں موجود ہیں، جن میں سے 502 فعال اور 25 غیر فعال ہیں۔ دستاویزات کے مطابق گزشتہ 9 ماہ سے 38 گاڑیاں سابق نگران وزرا اور مشیروں کے قبضے میں ہیں، جبکہ 5 گاڑیاں بااثر افراد کے پاس ہیں اور ان کی واپسی ممکن نہیں ہو سکی

مزید برآں، 44 گاڑیاں وزیراعلیٰ سیکرٹریٹ اور 47 گاڑیاں بلوچستان ہاؤسز اسلام آباد اور کراچی کے زیر استعمال ہیں، جب کہ محکمہ کی 166 گاڑیاں دیگر محکموں، کمشنرز اور ڈی سیز کے پاس ہیں۔ دستاویزات میں یہ بھی کہا گیا ہے کہ محکمہ کی 250 گاڑیوں پر سالانہ 18 کروڑ روپے کا فیول خرچ آتا ہے، جبکہ مرمت کے اخراجات 7 کروڑ روپے سالانہ ہیں۔
بلوچستان حکومت کی جانب سے ان گاڑیوں کی واپسی کے لیے ابھی تک کوئی واضح اقدامات جاری نہیں کیے جا سکے۔