پاکستان کو بچانے کے لیے دو طلاقیں ضروری ہیں،سینیٹر فیصل واوڈا

سینیٹر فیصل واوڈا کا کہنا ہے کہ پاکستان کو بچانے کے لیے دو طلاقیں ضروری ہیں۔

نجی ٹی وی پروگرام میں سینیٹر فیصل واوڈا نے کہا کہ پاکستان کو بچانے کے لیے ایک طلاق ن لیگ کو دینی ہوگی اور ایک بانی پی ٹی آئی کو۔ انہوں نے وضاحت کی کہ وہ سیاسی طلاق کی بات کر رہے ہیں۔

سینیٹر واوڈا نے کہا کہ حکومت نے اسمارٹ کھیل کر ریاست اور پی ٹی آئی کو آمنے سامنے لا کھڑا کیا ہے، اور مریم نواز کہتی ہیں کہ پی ٹی آئی کچرہ ہے، تو انہیں پہلے اپنی پارٹی میں سیاسی کچرا صاف کرنا چاہیے۔

انہوں نے مزید کہا کہ بانی پی ٹی آئی اور حکومت دونوں آرمی چیف کی کامیابیوں سے پریشان ہیں، کیونکہ جو بھی اچھا ہو رہا ہے، اس کا کریڈٹ آرمی چیف کو جاتا ہے۔

پی ٹی آئی کے احتجاج کے حوالے سے فیصل واوڈا نے کہا کہ ڈی پی او کا کہنا تھا کہ مظاہرین پانچ منٹ میں پہاڑوں پر چڑھ جاتے، ان کا کام لیکچر دینا نہیں، ایکشن کرنا ہے، جبکہ لیکچر دینا سیاستدانوں کا کام ہے۔

فیصل واوڈا نے کہا کہ اسلام آباد میں پختونوں کو اٹھانے کی مذمت کرتا ہوں، کیونکہ ن لیگ کا یہ وطیرہ ہے کہ وہ ہمیشہ کسی خاص زبان کے لوگوں پر حملہ کرتی ہے۔ اسلام آباد میں حکومت پختونوں کو اٹھا رہی ہے۔

انہوں نے کہا کہ یہ ایک سنجیدہ مسئلہ ہے کہ شناختی کارڈ دیکھ کر معصوم پختونوں کو گرفتار کیا جا رہا ہے۔

سینیٹر واوڈا نے کہا کہ یہ بھی کہا گیا کہ ڈی چوک سے علی امین گنڈا پوراہلیہ عمران خان کو زبردستی لے کر گئے، لیکن فوٹیجز آئیں کہ بشریٰ بی بی خود چل کر گاڑی میں سوار ہوئیں اور ڈی چوک سے روانہ ہو گئیں۔

فیصل واوڈا نے انکشاف کیا ہے کہ بشریٰ بی بی اور اس کے حواری عمران خان کو تباہی کی طرف دھیکیل رہے ہیں اور یہ بانی پی ٹی آئی کی لاش کا سودا کریں گے، پی ٹی آئی کے چھوٹے چھوٹے ٹکڑے ہوجائیں گے جبکہ وزیراعلیٰ گنڈا پور بشریٰ بی بی کو گرفتار کروائیں گے اور وہ یہی بات طے کر کے اسلام آباد سے لے کر گئے ہیں۔