15 بورڈز میں سے 10 وزارت تعلیم کے ساتھ رجسٹریشن چاہتے ہیں، علامہ طاہر اشرفی

اسلام آباد: چیئرمین پاکستان علما کونسل علامہ طاہر محمود اشرفی کا مدارس رجسٹریشن کے حوالہ سے وڈیو بیان میں کہا ہے کہ 15 بورڈز میں سے 10 سے زائد وزارت تعلیم کے ساتھ رجسٹریشن کے حق میں ہیں۔

انہوں نے کہا کہ ملک میں 18 ہزار سے زیادہ مدارس وزارت تعلیم کے ساتھ رجسٹر ہو چکے ہیں اور مدارس کی رجسٹریشن وزارت تعلیم سے وزارتِ صنعت کے تحت منتقل کرنے کی کوشش مسترد کرتے ہیں۔ انہوں نے مزید کہا کہ مدارس کی رجسٹریشن وزارتِ صنعت کے تحت کرنا ملکی قانون اور وحدت کے خلاف ہے اسی طرح مدارس کی آزادی اور نصاب کے معاملے پر کسی قسم کی مداخلت قبول نہیں۔

انہوں نے کہا اگر مولانا فضل الرحمان الگ قانون سازی کروانا چاہتے ہیں تو حکومت جانے اور جے یو آئی سربراہ، ہماری کوشش ہے کہ معاملہ افہام و تفہیم سے حل ہو۔ انہوں نے کہا کہ دس مدارس بورڈز کا فیصلہ ہے کہ ہم وزارت تعلیم کے ساتھ رجسٹریشن کے حق میں ہیں۔