ملک میں ٹھنڈی ہواؤں کا راج برقرار ، سردی کی شدت میں اضافہ

لاہور ، کراچی، اسلام آباد سمیت ملک کے مختلف شہروں میں سردی کی شدت میں اضافہ ہوا ہے ۔

کراچی میں رات اور صبح کے اوقات میں ٹھنڈی ہواؤں نے ڈیرے ڈال رکھے ہیں، صبح سویرے درجہ حرارت 12 ڈگری سینٹی گریڈ ریکارڈ کیا گیا ۔

 استوراور  بالائی علاقوں میں پہاڑوں پر برفباری سے سردی کی شدت میں اضافہ ہوگیا ، گزشتہ روز سب سے زیادہ سردی لہہ میں پڑی جہاں درجہ حرارت منفی دس ڈگری ریکارڈ کیا گیا۔ اسی طرح گوپس میں منفی سات، اسکردو، استور، کالام اور قلات میں پارہ منفی چھ تک گرگیا۔

دوسری جانب پہاڑی تودہ گرنے سے گلگت اسکردو روڈ بند ہوگیا، پولیس کے مطابق پہاڑی تودہ باغیچہ کے مقام پر گرا ہے۔

یہ بھی پڑھیں :عطا تارڑ نے حکومت اور پی ٹی آئی کے درمیان مذاکرات کی تردید کر دی

محکمہ موسمیات کی جانب سے آج بھی گلگت بلتستان، بالائی خیبرپختونخوا اور کشمیر میں ہلکی بارش اور برفباری کی پیش گوئی کی گئی ہے۔

محکمہ موسمیات کا بتانا ہے کہ  ملک کے بیشتر علاقوں میں موسم آج شدید سرد اور خشک رہے گا، جبکہ پہاڑی علاقے شدید سردی کی لپیٹ میں رہیں گے، مری اور گلیات میں ہلکی بارش و برفباری ہوگی اور جنوبی پنجاب اور بالائی سندھ میں ہلکی دُھند چھائے رہنے کا امکان ہے۔

محکمہ موسمیات نے سردی کی موجودہ لہر15 دسمبر تک برقرار رہنے کی پیشگوئی کر رکھی ہے۔

ادھر محکمہ موسمیات کے اعداد وشمار کے مطابق آلودگی کے اعتبار سے لاہور پاکستان میں پہلے نمبر پر ہے، شہر میں سموگ کی اوسط شرح 277 ریکارڈ کی گئی ہے۔