قومی ٹیم کے ہیڈ کوچ جیسن گلیسپی کے مستعفی ہونے کی اصل وجہ سامنے آ گئی

پاکستان کرکٹ ٹیم کے ریڈ بال ہیڈ کوچ ٹیم جیسن گلیسپی نے اپنے عہدے سے کیوں استعفیٰ دیا تھا ، اس سے متعلق تفصیلات سامنے آگئیں ۔

نجی ٹی وی کے مطابق جیسن گلیسپی کے استعفیٰ دینے کے بعد پاکستان کرکٹ بورڈ (پی سی بی ) نے ان کے مستعفی ہونے کی تصدیق کر دی تھی اورعاقب جاوید کو ریڈ بال کا قومی ٹیم کا نیاعبوری ہیڈ کوچ مقرر کردیا۔

یہ بھی پڑھیں:اب میرا ہدف ورلڈ ریکارڈ قائم کرنا ہے: ارشد ندیم

اس کے علاوہ عاقب جاوید وائٹ بال کے بھی عبوری ہیڈ کوچ ہیں۔ذرائع کا کہنا ہے کہ قومی ٹیم کے ریڈ بال ہیڈ کوچ جیسن گلیسپی کی بورڈ کے ساتھ سلیکشن کمیٹی کا حصہ برقرار نہ رہنے پر ناراضگی شروع ہوئی۔

بعد ازاں انہوں نے اپنے مطالبات منظور نہ ہونے پر مستعفی ہونے کا فیصلہ کیا۔ جیسن گلیسپی نے سلیکشن کمیٹی کا حصہ برقرار نہ رہنے کے بعد دونوں فارمیٹ کا ہیڈ کوچ بننا چاہا، دونوں فارمیٹ کے کوچ بننے کے ساتھ مزید معاوضے کا بھی مطالبہ کیا۔

ذرائع کے مطابق چیئرمین پی سی بی محسن نقوی نے جیسن گلیسپی کی جانب سے معاوضے میں اضافے کا مطالبے کو ماننے سے انکار کردیا تھا۔ کرکٹ بورڈ نے جسین گلیسپی کو پاکستان میں زیادہ رہنے کا کہا جس پر بھی وہ رضامند نہیں تھے۔ گیری کرسٹن نے بھی سیریز کے علاوہ پاکستان رہنے سے انکار کیا تھا۔

یہ بھی پڑھیں:پاکستان کیخلاف ون ڈے سیریز سے جنوبی افریقہ کا اہم کھلاڑی باہر

گیری کرسٹن اور جیسن گلیسپی اپنی پسند کے سپورٹ اسٹاف کا بھی مطالبہ کرتے تھے۔ خیال رہے کہ گیری کرسٹن نے بھی دورہ آسٹریلیا سے قبل استعفیٰ دیا جبکہ جیسن گلیسپی نے جنوبی افریقا کے خلاف ٹیسٹ سیریز سے قبل استعفیٰ دیا۔ واضح رہے کہ جیسن گلیسپی کو آج جنوبی افریقا پہنچ کر پری ٹیسٹ سیریز کیمپ کی نگرانی کرنا تھی۔