انسداد دہشت گردی عدالت لاہور نے مسلم لیگ (ن) کا دفتر جلانے کے کیس میں پاکستان تحریک انصاف (پی ٹی آئی) کے رہنماؤں حماد اظہر، اسلم اقبال، مراد سعید، واثق قیوم، زبیر خان اور دیگر کو اشتہاری قرار دیتے ہوئے ملزمان کے دائمی وارنٹ گرفتاری بھی جاری کر دیے ۔
انسداد دہشت گردی عدالت کے جج ارشد جاوید نے مسلم لیگ (ن) کے دفتر جلانے سے متعلق مقدمے کی سماعت کی، جس میں ملزمان کے اشتہاری ہونے پر کارروائی کی گئی۔
پولیس نے عدالت میں بتایا کہ پی ٹی آئی رہنما گرفتاری کے خوف سے روپوش ہیں۔ پولیس نے موقف اختیار کیا کہ ملزمان کے خلاف تھانہ سرور روڑ میں 2 مقدمات اور تھانہ ماڈل ٹاؤن میں ایک مقدمہ درج کیا گیا ہے۔ جس پر عدالت نے ملزمان کو اشتہاری قرار دیدیا۔
یاد رہے کہ لاہور کی انسداد دہشت گردی عدالت نے گزشتہ روز شادمان جلاو گھیرائو کیس میں پی ٹی آئی کے رہنماؤں شاہ محمود قریشی، یاسمین راشد اور محمود الرشید پر فرد جرم عائد کی تھی۔ پی ٹی آئی رہنماؤں نے صحت جرم سے انکار کیا تھا۔
عدالت نے گواہوں کو آئندہ سماعت پر طلب کیا اور کیس کی سماعت 19 دسمبر تک ملتوی کر دی۔
By 
