مدارس رجسٹریشن بل: اتحاد تنظیمات المدارس کا اہم اجلاس طلب

اسلام آباد: تمام مسالک کے مدارس کی مشترکہ تنظیم اتحاد تنظیمات المدارس دینیہ پاکستان کا اہم اجلاس کل بعد نماز مغرب جامع مسجد عثمان غنی اسلام آباد میں ہوگا۔

اجلاس میں اتحاد تنظیمات المدارس کے سربراہی اجلاس میں امیر جے یو آئی مولانا فضل الرحمن خصوصی طور پر شرکت کریں گے۔

اجلاس میں صدر مملکت کی جانب سے مدارس رجسٹریشن بل پر دستخطوں سے انکار کی وجوہات پر غور کیا جائے گا، جبکہ مولانا فضل الرحمن حکومت کی طرف سے نئے بل میں مجوزہ ترامیم کا مسودہ پیش کریں گے۔

اتحاد تنظیمات المدارس دینیہ حکومتی تجاویز کو قبول کرنے یا نہ کرنے، یا نئی ترامیم دینے پر اپنا لائحہ عمل سامنے لائے گا۔ تنظیم اس بات پر بھی غور کر سکتی ہے کہ پہلے سے منظور شدہ بل پر دستخطوں کا مطالبہ کیا جائے۔

حکومت نے علماء کے متفق ہونے کی صورت میں پارلیمنٹ کا مشترکہ اجلاس سترہ دسمبر کو بلانے کا عندیہ دے چکی ہے، جب کہ اس اجلاس کو سولہ دسمبر سے سترہ دسمبر تک مولانا فضل الرحمن کی تجویز پر موخر کیا گیا ہے۔

اتحاد تنظیمات المدارس کا اجلاس سوموار کو ہوگا، جبکہ وفاق المدارس العربیہ کا اجلاس منگل کو بلایا جائے گا۔ ان اجلاسوں کی روشنی میں وفاق المدارس تحریک چلانے یا حکومتی ترامیم کے حوالے سے فیصلہ کرے گا۔