آرمی چیف جنرل عاصم منیر کا سینٹ جوزف کیتھیڈرل کا دورہ، کرسمس تقریب میں شرکت

راولپنڈی: آرمی چیف جنرل عاصم منیر نے کرسمس کے موقع پر راولپنڈی کے سینٹ جوزف کیتھولک کیتھیڈرل چرچ کا دورہ کیا اور مسیحی برادری کے ساتھ کرسمس کی خوشیاں منائیں۔

آئی ایس پی آر کے مطابق اس دورے کا مقصد باہمی ہم آہنگی اور شمولیت کے جذبے کو اجاگر کرنا تھا۔ مسیحی برادری نے آرمی چیف کا پرتپاک استقبال کیا اور ان کی شرکت پر اظہارِ تشکر کیا۔

جنرل عاصم منیر نے اس موقع پر مسیحی برادری کو کرسمس کی دلی مبارکباد دی اور کہا کہ کرسمس ہمیں ہمدردی، سخاوت اور خیرسگالی کے آفاقی اصولوں کی یاد دلاتی ہے، جو ہماری متنوع قوم کو جوڑنے والی بنیاد ہیں۔
آرمی چیف نے اقلیتوں کو پاکستان کی ثقافتی، سماجی، معاشی اور قومی ترقی میں نمایاں خدمات انجام دینے پر سراہا اور انہیں قومی فخر اور قوت کا ذریعہ قرار دیا۔

انہوں نے قائداعظم محمد علی جناح کو خراج عقیدت پیش کرتے ہوئے کہا کہ قائداعظم کی بصیرت افروز قیادت، پختہ عزم اور اصولوں پر سختی سے کاربند رہنے کی وجہ سے پاکستان کا قیام ممکن ہوا۔ جنرل عاصم منیر نے قائداعظم کے آزادی، مساوات اور مذہبی رواداری کے اصولوں کو قوم کے لیے رہنمائی فراہم کرنے والے اصول قرار دیا اور کہا کہ آج ہم یہ عہد کرتے ہیں کہ قائداعظم کے خواب کو حقیقت میں بدلنے کے لیے اپنی بھرپور کوششیں جاری رکھیں گے تاکہ پاکستان ایک پرامن اور خوشحال ملک بنے۔