کیبن کریو بننے کی خواہشمند خواتین کے لیے خوشخبری

قومی ایئرلائن ایئرسیال نے خواتین کے لیے کیبن کریو کی آسامیوں پر واک اِن انٹرویوز کا اعلان کر دیا ہے، جہاں کامیاب امیدواروں کو ایک لاکھ روپے ماہانہ ابتدائی تنخواہ کے ساتھ دیگر مراعات بھی فراہم کی جائیں گی۔

ایئرسیال کی جانب سے جاری اعلامیے کے مطابق پشاور میں واک اِن انٹرویوز پیر، 13 جولائی 2026 کو صبح 10:30 بجے سے شام 4:00 بجے تک منعقد ہوں گے۔ انٹرویوز سرینا ہوٹل، خیبر روڈ، پشاور میں لیے جائیں گے، جبکہ منتخب امیدواروں کی تعیناتی ایئرسیال کے پشاور بیس اسٹیشن پر کی جائے گی۔

اعلامیے کے مطابق امیدواروں کے لیے بزنس ڈریس میں انٹرویو میں شرکت لازمی ہوگی۔

اہلیت کا معیار

ایئرسیال نے غیر شادی شدہ خواتین سے درخواستیں طلب کی ہیں جن کی عمر 18 سے 25 سال کے درمیان ہو۔ امیدوار کا کم از کم انٹرمیڈیٹ یا اے لیول پاس ہونا ضروری ہے۔

اس کے علاوہ قد کم از کم 5 فٹ 2 انچ ہونا چاہیے جبکہ وزن باڈی ماس انڈیکس (BMI) کے مطابق مناسب ہونا لازمی ہے۔ امیدواروں کے لیے اردو اور انگریزی زبان پر اچھی گرفت، مؤثر ابلاغی صلاحیت، خوش اخلاقی، بہتر باہمی روابط اور پروفیشنل شخصیت بھی ضروری قرار دی گئی ہے۔

یہ بھی پڑھیں:حکومت نے بجلی بلوں پر بڑی پیچیدگی ختم کر دی

درکار دستاویزات

امیدواروں کو انٹرویو کے وقت اصل قومی شناختی کارڈ اور اس کی ایک فوٹو کاپی، حالیہ پاسپورٹ سائز رنگین تصویر، تازہ ترین ریزیومے اور میٹرک و انٹرمیڈیٹ یا اے لیول کے سرٹیفکیٹس کی نقول ساتھ لانا ہوں گی۔

اعلامیے میں پیشگی رجسٹریشن کا کوئی ذکر نہیں کیا گیا، لہٰذا تمام اہل امیدوار مطلوبہ دستاویزات کے ساتھ براہِ راست واک اِن انٹرویو میں شرکت کر سکتے ہیں۔

ایبٹ آباد میں بھی بھرتیوں کا اعلان

ایئرسیال کی جانب سے اسی نوعیت کی واک اِن بھرتیاں منگل، 14 جولائی 2026 کو ایبٹ آباد میں بھی منعقد کی جائیں گی۔ انٹرویوز ہوٹل ون، مانسہرہ روڈ پر صبح 10:30 بجے سے شام 4:00 بجے تک ہوں گے۔

ایبٹ آباد میں بھی اہلیت کا معیار، مطلوبہ دستاویزات، تنخواہ اور مراعات کا پیکج اور تعیناتی کا مقام پشاور بیس اسٹیشن ہی ہوگا