ایپل کی جانب سے آئی فون 16 سیریز کا سستا ترین فون آنے والے مہینوں میں متعارف کرائے جانے کا امکان ہے۔
ایک رپورٹ کے مطابق ایپل نئے کم قیمت آئی فون ایس ای کو آئی فون 16 ای کے نام سے متعارف کرائے گا، جس سے یہ آئی فون 16 سیریز کا حصہ بن جائے گا اور ماضی کے ایس ای ماڈلز سے مختلف ہوگا۔
قبل ازیں لیکس میں بتایا گیا تھا کہ آئی فون ایس ای 4 اس سیریز کے دیگر ماڈلز سے بالکل مختلف ہوگا اور اس کا ڈیزائن آئی فون 14 سے ملتا جلتا ہوگا۔ نئے ماڈل میں ہوم بٹن کو ہٹا دیا جائے گا اور اسکرین پر فرنٹ کیمرا نوچ ڈیزائن میں دیا جائے گا۔ ایک اور لیک میں بتایا گیا تھا کہ فون کے اندر ایپل کا نیا اے 18 پراسیسر موجود ہوگا، جو آئی فون 16 کا حصہ ہوگا۔
اس نئے پراسیسر سے فون کی کارکردگی بہتر ہوگی اور اے آئی فیچرز بھی صارفین کو دستیاب ہوں گے۔اگر یہ لیک درست ہوئی تو یہ ایپل کا سستا ترین اے آئی فون ہوگا۔ مختلف رپورٹس میں بتایا گیا ہے کہ اس نئے ماڈل میں 6.06 انچ کا او ایل ای ڈی ڈسپلے دیا جائے گا، فون کے بیک پر 48 میگا پکسل کا کیمرا دیا جانے کا امکان ہے، جبکہ فرنٹ میں 12 میگا پکسل کا کیمرا موجود ہوگا۔
اس ماڈل کی بیٹری بھی پہلے سے زیادہ بڑی ہوگی، اور وائی فائی 6، بلیو ٹوتھ 5.3 اور 5 جی سپورٹ بھی دستیاب ہوں گے۔ چارجنگ کے لیے یو ایس بی سی پورٹ کو ڈیوائس کا حصہ بنایا جا رہا ہے۔
ایپل کے اس سستے آئی فون کو مارچ 2025 میں متعارف کرایا جا سکتا ہے، اور نئی لیکس کے مطابق یہ فون بلیک اور وائٹ رنگوں میں دستیاب ہوگا۔
By 
