نادرا نے شہریوں کی بڑی مشکل آسان کردی

نادرا نے شہریوں کے لیے ایک اہم اور سہولت فراہم کرنے والی بائیکر سروس کا آغاز کر دیا ہے، جس کے ذریعے کراچی کے شہری گھر بیٹھے اپنے شناختی کارڈ کی تجدید اور دیگر سروسز سے استفادہ کر سکیں گے۔

تفصیلات کے مطابق نادرا کی جانب سے متعارف کروائی گئی یہ سروس خاص طور پر شہریوں کی پریشانیوں کو کم کریں گی، جس میں شناختی کارڈ کی تجدید جیسے اہم امور کی انجام دہی بائیکرز کے ذریعے کی جائے گی۔

ڈی جی نادرا کراچی ریجن نے اس سروس کے آغاز کے موقع پر بائیکرز کو متعلقہ آلات سے آراستہ بائیک کی چابیاں حوالے کیں۔ اس دوران انہوں نے کہا کہ شہری نادرا کی ہیلپ لائن پر خود کو رجسٹر کروا کر بائیکر سروس سے فائدہ اٹھا سکتے ہیں۔ نادرا سندھ کے ڈی جی نے واضح کیا کہ اس سروس کے ذریعے نیا شناختی کارڈ جاری نہیں کیا جائے گا بلکہ یہ صرف شناختی کارڈ کی تجدید اور دیگر سروسز کے لیے دستیاب ہو گی۔

مزید پڑھیں: پاسپورٹ بنوانے والوں کیلئے اچھی خبر آگئی

یہ بائیکر سروس ہر پیر سے جمعہ تک صبح 8 بجے سے 5 بجے تک فعال ہوگی۔ ڈی جی نادرا سندھ نے بتایا کہ اس سروس کا آغاز کراچی، حیدرآباد اور میرپور خاص میں ابتدائی طور پر کیا جائے گا۔ شہری اس سروس سے فائدہ اٹھانے کے لیے نادرا کی ہیلپ لائن پر 7000 یا 111786100 پر کال کر سکتے ہیں، جہاں کال سینٹر سے شہری کے ایڈریس اور مطلوبہ سروس کے حوالے سے معلومات حاصل کی جائیں گی۔

ابتدائی طور پر کراچی میں تین، حیدرآباد اور میرپور خاص میں ایک بائیکر رائیڈر سروس فراہم کریں گے۔ اس سروس کا مقصد شہریوں کو ان کے گھر تک پہنچ کر شناختی کارڈ کی تجدید کی سہولت فراہم کرنا ہے تاکہ انہیں نادرا کے دفاتر جانے کی ضرورت نہ پڑے اور وقت کی بچت ہو سکے۔

نادرا حکام کا کہنا ہے کہ اس سروس کا آغاز کراچی، حیدرآباد اور میرپور خاص کے شہریوں کے لیے کیا گیا ہے، جس کا آغاز 20 جنوری سے کراچی ریجن میں کر دیا گیا ہے۔ نادرا کا یہ اقدام شہریوں کی مشکلات کو کم کرنے اور خدمات کی فراہمی کو زیادہ موثر بنانے کے لیے ایک اہم قدم ثابت ہو گا۔

نادرا کی اس نئی سروس سے شہریوں کو نہ صرف شناختی کارڈ کی تجدید میں آسانی ہو گی بلکہ یہ سروس دفاتر کے چکر لگانے کی ضرورت کو بھی ختم کر دے گی۔ اس کے علاوہ، نادرا نے یہ سروس اس لیے شروع کی ہے تاکہ شہریوں کو ان کی دہلیز پر خدمات فراہم کی جا سکیں اور زیادہ سے زیادہ افراد کو اس سہولت سے فائدہ پہنچایا جا سکے۔

اس سروس کے آغاز سے نادرا نے اپنی سروسز کو مزید عوام دوست اور شہریوں کے لیے آسان بنانے کی کوشش کی ہے، جس سے شہریوں کی بڑی پریشانیوں کا حل نکلے گا اور وہ گھر بیٹھے ہی اپنی ضروریات پوری کر سکیں گے۔