اسرائیلی فوج کے سربراہ اپنے عہدے سے مستعفی ہوگئے

تل ابیب: اسرائیلی فوج کے سربراہ لیفٹیننٹ جنرل ہرزی ہلیوی نے 7 اکتوبر 2023 کو حماس کے حملے روکنے میں ناکامی کے باعث اپنے عہدے سے استعفیٰ دینے کا اعلان کیا ہے۔

غیر ملکی میڈیا رپورٹس کے مطابق، ہلیوی نے اسرائیلی وزیراعظم اور وزیر دفاع کو ایک خط لکھا جس میں کہا کہ وہ 6 مارچ 2025 تک اپنی مدت مکمل کرنا چاہتے ہیں۔

ہرزی ہلیوی نے اپنے خط میں لکھا ہے کہ 7 اکتوبر کی صبح ان کی کمانڈ میں اسرائیلی ڈیفنس فورسز اسرائیل کے شہریوں کو تحفظ فراہم کرنے میں ناکام رہیں، جس کے نتیجے میں اسرائیل نے بھاری قیمت ادا کی۔ انہوں نے تسلیم کیا کہ اسرائیلی شہریوں کو حماس کے حملوں سے بچانے میں ناکامی کا خمیازہ بھگتنا پڑا۔

اسرائیلی میڈیا کے مطابق وزیر دفاع نے ہلیوی کو 30 جنوری تک حماس کے حملوں کو روکنے میں ناکامی کی تحقیقات مکمل کرنے کی مہلت دی تھی۔ عرب میڈیا کا کہنا ہے کہ اسرائیلی آرمی چیف کی مدت ملازمت مارچ 2025 میں ختم ہو رہی تھی اور بدنامی سے بچنے کیلئے انہوں نے اپنے عہدے استعفیٰ دے دیا۔

یاد رہے کہ 7 اکتوبر کو حماس کے اسرائیل پر حملوں میں ایک ہزار سے زائد اسرائیلی ہلاک ہوئے جبکہ سینکڑوں شہریوں اور فوجیوں کو یرغمال بنا کر غزہ بھی لے گئے۔ ان حملوں کے بعد اسرائیل نے غزہ پر وحشیانہ فضائی بمباری شروع کردی اور کچھ دن بعد زمینی کارروائی بھی کی تھی۔