نیتن یاہو نے فلسطینی ریاست سعودی عرب میں بنانے کی تجویز دیدی

اسرائیلی وزیر اعظم نیتن یاہو نے فلسطینی ریاست سعودی عرب میں بنانے کی تجویز دے ڈالی ۔

دورہ امریکا کے دوران اسرائیلی میڈیا کو انٹرویو دیتے ہوئے بینجمن نیتن یاہو کا کہنا تھا کہ فلسطینی ریاست کا قیام اسرائیل کی سلامتی کےلیے خطرہ ہے۔

انہوں نے کہا کہ سعودی فلسطینی ریاست سعودی عرب میں بنا سکتے ہیں، سعودیوں کے پاس وہاں بہت زیادہ زمین موجود ہے۔

نیتن یاہو نے مزید کہا کہ اسرائیل اور سعودی تعلقات صرف قابل عمل نہیں بلکہ یہ ہونے جا رہا ہے۔

خیال رہے کہ اسرائیلی وزیراعظم نے امریکی صدر ڈونلڈ ٹرمپ کے غزہ پر قبضے کے بیان کے بعد اسرائیلی میڈیا کو انٹرویو دیا تھا۔

یہ بھی پڑھیں : پی ٹی آئی یکطرفہ طور پر مذاکراتی عمل سے نکل گئی ہے ، سینیٹر عرفان صدیقی

اسرائیلی وزیراعظم کے سعودی سرزمین پر فلسطینی ریاست قائم کرنےکے بیان کی مصر نے شدید مذمت کی ہے۔

مصر کا کہنا ہےکہ اسرائیلی بیان  سعودی خودمختاری کی خلاف ورزی ہے،  سعودی عرب کی سلامتی مصر کی ریڈ لائن ہے۔

اس سے قبل سعودی وزارت خارجہ  نے کہا تھا کہ اسرائیل کے ساتھ تعلقات کے معمول پر آنے کا معاملہ فلسطینی ریاست کے قیام کے بغیر زیر غور نہیں آسکتا۔

سعودی وزارت خارجہ کا کہنا ہے کہ فلسطینی ریاست کے قیام کے بغیر سعودی عرب اسرائیل سے تعلقات قائم نہیں کرے گا، فلسطینی ریاست کے قیام سے متعلق سعودی عرب کا مؤقف مضبوط اور غیر متز لزل ہے۔

خیال رہےکہ گزشتہ دنوں امریکی صدر ڈونلڈ ٹرمپ نے غزہ پر امریکا کی جانب سے قبضہ کرنےکا اعلان کیا تھا۔