کل کن علاقوں میں موسلادھار بارش ہو گی؟ محکمہ موسمیات نے انتباہ بھی جاری کر دیا

محکمہ موسمیات نے ملک کے مختلف علاقوں میں موسلادھار بارش ہونے کی پیشگوئی کر دی۔

محکمہ موسمیات کے مطابق خیبرپختونخوا،  کشمیر،  گلگت بلتستان، بالائی اور وسطی   پنجاب، اسلام آباد اور  شمالی بلوچستان  میں  تیز ہوائوں  اور گرج چمک کے ساتھ وقفے وقفے سے بارش کا سلسلہ جاری رہے گا، چند مقامات پر ژالہ باری اور پہاڑوں پر برفباری کا امکان ہے۔  بالائی خیبرپختونخوا اور کشمیر  میں بعض  مقامات پر موسلادھار بارش اور شدید برفباری  کی پیشگوئی کی گئی ہے۔

محکمہ موسمیات نے انتباہ جاری کرتے ہوئے کہا ہے کہ 26 فروری کے دوران شدید برفباری کی وجہ سے مری، گلیات، ناران، کاغان،  دیر، سوات، کوہستان، مانسہرہ، ایبٹ آباد، شانگلہ، استور، ہنزہ، اسکردو، وادی نیلم، باغ، پونچھ، حویلی،  کوئٹہ، زیارت، چمن، پشین، قلعہ عبداللہ اور قلعہ سیف اللہ میں سڑکیں بند ہونے اور پھسلن کے باعث ٹریفک کی روانی میں خلل پڑ سکتا ہے۔

انتباہ کرتے ہوئے کہا گیا ہے کہ شدید بارش اور برفباری کی وجہ سے خیبرپختونخوا کے پہاڑی علاقوں ،  کشمیر ، گلگت بلتستان ، مری اور گلیات میں لینڈ سلائیڈنگ اور برفانی تودے گرنے کا خطرہ ہے، سیاحوں کو بارش اور برفباری کے دوران محتاط رہنے اور غیر ضروری سفر سے اجتناب کرنے کی ہدایت کی گئی ہے۔

رمضان کی وجہ سے کراچی میں نویں اور دسویں جماعت کے امتحانات کا شیڈول تبدیل

کل اسلام آباد اور گرد و نواح میں وقفے وقفے  سے تیز ہواؤں اور گرج چمک کے ساتھ  مزید بارش  جبکہ صبح کے دوران  چند مقاما ت پر تیز بارش کی پیشگوئی کی گئی ہے۔

کل 26 فروری کو دیر، چترال، کوہستان، سوات، شانگلہ، مانسہرہ ،بونیر، ایبٹ آباد ،  صوابی، مردان، مالاکنڈ، باجوڑ، مہمند، خیبر، کرم، نوشہرہ، پشاور، چارسدہ، کوہاٹ، کرک، بنوں، وزیرستان، لکی مروت اور ڈی آئی خان میں تیز آندھی اور گرج چمک کے ساتھ  وقفے وقفے سے   بارش اور پہاڑوں پر برفباری جبکہ چند مقامات پر ژالہ باری کی پیشگوئی کی گئی ہے۔ شام اور رات کے اوقات میں بالائی اضلاع میں تیز بارش اور شدید برفباری  کی توقع ہے۔

کل راولپنڈی، اٹک، جہلم ، گجرات، چکوال، میانوالی،  منڈی بہاؤالدین، سرگودھا، خوشاب،  فیصل آباد،  ٹوبہ ٹیک سنگھ، جھنگ، لاہور، اوکاڑہ، شیخوپورہ، گوجرانوالہ، سیالکوٹ، نارووال، ڈی جی خان، لیہ، بھکرمیں تیز ہوائوں اور گرج چمک کے ساتھ  بارش کے ساتھ ساتھ کچھ علاقوں میں ژالہ باری کا بھی امکان ہے۔ مری، گلیات اور گرد و نوا ح میں تیزہواؤں  کے ساتھ  وقفے وقفے سے بارش اور برفباری  جبکہ بعض  مقامات پر  تیز بارش اور شدید برفباری  کی پیشگوئی کی گئی ہے۔

کوئٹہ، زیارت، چمن، پشین، قلعہ عبداللہ، قلعہ سیف اللہ، قلات، ژوب،  بارکھان،  خضدار اور موسیٰ خیل میں تیز ہواؤں اور گرج چمک کے ساتھ بارش اور پہاڑوں پر برفباری کی توقع ہے۔ کشمیر  اور گلگت بلتستان میں   تیز ہواؤں اور گرج چمک کے ساتھ  وقفے وقفے سے   بارش اور برفباری کا  امکان ہے جبکہ کشمیر میں  بعض  مقامات پر موسلادھار بارش اور شدید برفباری   کی پیشگوئی ہے۔