رمضان المبارک کے دوران ضرورت مندوں کی مدد کی جائے : صدر مملکت

صدر مملکت آصف علی زرداری نے رمضان المبارک کے دوران ضرورت مندوں کی مدد پر زور دیا۔

تفصیلات کے مطابق صدر آصف علی زرداری نے رمضان المبارک کے آغاز پر قوم کو مبارکباد دیتے ہوئے کہا کہ یہ رحمت، مغفرت اور جہنم سے نجات کا مہینہ ہے۔ ماہ رمضان کے آغاز پر قوم کے نام اپنے پیغام میں صدر مملکت نے کہا کہ رمضان تزکیہ نفس، صبر، استقامت، ہمدردی، مساوات اوراتحاد کا درس دیتا ہے۔

یہ بھی پڑھیں:ایوان صدر نے حکومت سے ایک سالہ کارکردگی کی رپورٹ مانگ لی

انہوں نے کہا کہ رمضان تقویٰ، اخلاص اور اللہ تعالیٰ کا قرب حاصل کرنے کا بہترین موقع ہے۔ اس بابرکت مہینے میں غریبوں اور ناداروں کی ضروریات پوری کی جائیں اور معاشرے میں بے لوثی اور قربانی کے جذبے کو فروغ دیا جائے۔ انہوں نے کہا کہ رمضان مسلمانوں کو انفرادی اور اجتماعی سطح پر اصلاح کا ماحول بنا کر اپنی زندگی کو نئے سرے سے شروع کرنے کا بہترین موقع فراہم کرتا ہے۔

صدر مملکت نے کہا کہ ماہ صیام ہمیں ضرورت مند اور محروم طبقے کے دکھ درد کا بھی احساس دلاتا ہے۔ انہوں نے کہا کہ رمضان المبارک میں دوسروں کی مدد کریں۔صدر آصف زرداری نے پاکستانی قوم سے بھی اپیل کی کہ وہ خیرات میں بڑھ چڑھ کر حصہ لیں اور اس بابرکت مہینے میں ضرورت مندوں پر خصوصی توجہ دیں۔

یہ بھی پڑھیں:علی امین گنڈاپور نے قید کار کنان کے اہل خانہ کے لئے راشن فراہم کر دیا

انہوں نے کہا کہ وسائل سے بڑھ کر غریبوں کا سہارا بننے کی ضرورت ہے۔ صدر مملکت نے دعا کی کہ اللہ تعالیٰ ہمیں رمضان المبارک کی برکات سے مستفید ہونے، صبر و تقویٰ کو اپنانے اور امت مسلمہ کی فلاح و بہبود کیلئے کردار ادا کرنے کی توفیق عطا فرمائے۔ انہوں نے اللہ تعالیٰ سے دعا کی کہ یہ مہینہ ملک پاکستان کے لیے امن، استحکام، ترقی اور خوشحالی کا پیغام لے کر آئے۔