وفاقی وزیر امورکشمیر و گلگت بلتستان اور صدر مسلم لیگ (ن) خیبرپختونخوا انجینئر امیر مقام نے کہا ہے کہ بانی پی ٹی آئی عمران خان کے خطوط کا کوئی مستقبل نہیں ہے۔
تفصیلات کے مطابق سوات میں عوامی اجتماع سے خطاب میں امیر مقام کا کہنا تھاکہ بانی تحریک انصاف کو امریکی صدر ڈونلڈ ٹرمپ کے یوکرین کے صدر کیساتھ رویے سے سبق سیکھنا چاہیے۔
انہوں نے کہا کہ ان کے تحریر کردہ خطوط کا کوئی مستقبل نہیں،کیونکہ ان کے خطوط کا مقدر صرف ردی کی ٹوکری ہے، وزیرِاعظم میاں محمد شہباز شریف کی قیادت میں پاکستان معاشی بحالی اور استحکام کی راہ پر گامزن ہے۔
ان کا کہنا تھا کہ مہنگائی میں کمی، برآمدات میں اضافہ اور بڑے ترقیاتی پراجیکٹس کی بحالی اس کا واضح ثبوت ہیں، (ن) لیگ کی حکومت عوام کو ریلیف فرا ہمی کیلئے دن رات کام کر رہی ہے جس کے نتائج جلد سامنے آئیں گے ۔
امیر مقام نے کہا کہ وزیراعلیٰ پنجاب مریم نواز شریف عوامی خدمت میں مصروف ہیں، پنجاب میں صحت، تعلیم، انفراسٹرکچر اور سوشل ویلفیئر کے منصوبے برق رفتاری سے مکمل کیے جا رہے ہیں، عوام کو حقیقی معنوں میں ریلیف مل رہا ہے ۔
ہمارے قائد نواز شریف کا ویژن ملک کو ترقی کی راہ پر واپس لانا ہے۔ان کا کہنا تھا کہ نواز شریف نے ہمیشہ عوامی خدمت، معاشی ترقی اور ملکی استحکام کو ترجیح دی، اپوزیشن کو سول ملٹری الائنس ہضم نہیں ہو رہا اور وہ اس حوالے سے بے بنیاد پروپیگنڈا کر رہی ہے۔
وفاقی وزیر نے کہا کہ اگلے جنرل انتخابات 2029 میں ہوں گے، اپوزیشن کو انتظار کرنا پڑے گا، پی ٹی آئی حکومت کے پاس صوبے کے عوام کے لیے کوئی ٹھوس منصوبہ نہیں،محض اقتدار کے حصول میں مصروف ہیں، پہلے اسلام آباد پر قبضے کے خواب، اب وزارتوں کیلئےسرگرداں ہیں۔
امیر مقام کا مزید کہنا تھا کہ پختونخوا کے عوام پی ٹی آئی کی حقیقت جان چکے ، یہی وجہ ہے کہ ان کی مقبولیت کا گراف دن بدن تیزی سے گر رہا ہے، اوورسیز پاکستانیوں نے بھی پی ٹی آئی کی کال کو ریجیکٹ کر دیا ہے۔
By 
