افراط زر 1.5 فیصد پر آگئی، عوام کو معاشی بہتری کے ثمرات ملنا شروع ہو گئے، وزیراعظم

وزیراعظم شہباز شریف نے کنزیومر پرائس انڈیکس کے تحت افراط زر میں مسلسل کمی پر اطمینان کا اظہار کرتے ہوئے اسے خوش آئند قرار دیا ہے۔

شہباز شریف نے کہا کہ فروری میں افراط زر 1.5 فیصد تک آ گئی، جو ستمبر 2015 کے بعد کم ترین سطح ہے۔ اپنے بیان میں وزیراعظم نے کہا کہ موجودہ حکومت کے ایک سال مکمل ہونے کے موقع پر یہ ایک بڑی مثبت پیش رفت ہے۔ انہوں نے بتایا کہ جولائی 2024 سے فروری 2025 تک افراط زر کی اوسط شرح 5.9 فیصد رہی، جب کہ گزشتہ مالی سال کے اسی عرصے میں یہ 28 فیصد تھی، جو نمایاں کمی ہے۔

وزیراعظم نے معاشی ٹیم کی کاوشوں کو سراہتے ہوئے کہا کہ معاشی اشاریے مسلسل بہتری کی جانب گامزن ہیں اور یہ مستعد ٹیم ورک کا نتیجہ ہے۔ انہوں نے مزید کہا کہ کاروبار اور سرمایہ کاری کے فروغ کے لیے تمام ادارے مل کر کام کر رہے ہیں۔

انہوں نے اس امید کا اظہار کیا کہ افراط زر میں مزید کمی آئے گی، جبکہ عوام کو بنیادی اشیاء سستے داموں فراہم کرنا حکومت کی اولین ترجیح ہے۔