جماعت اسلامی پاکستان کےامیر حافظ نعیم الر حمٰن نے حکومت کی جانب سے 70 روپے فی لٹر پٹرول لیوی کے نفاذ کو مسترد کر دیا۔
لاہور منصورہ سے جاری کیے گئے اپنے ایک بیان میں حافظ نعیم الرحمان کا مطالبہ کرتے ہوئے کہنا تھا کہ فوری طور پر پٹرول کی قیمتوں میں کمی اور بجلی کے بلوں میں عوام کو ریلیف دیا جائے ۔
انہوں نے کہا کہ ملک کے معاشی حالات دن بدن بگڑتے جا رہے ہیں ، موجودہ نااہل حکومت کی ناقص پالیسیوں کی وجہ سے عوام کو مزید مشکلات درپیش ہیں ۔ جب قوم کا مینڈیٹ چوری کیا جائے تو عوام حکمرانوں سے یکجہتی کا مظاہرہ کیسے کر سکتے ہیں؟۔
امیرجماعت اسلامی نے الزام عائد کرتے ہوئے کہا کہ جب تک فارم 47 کے مطابق حکومتیں ملک پرمسلط کی جائیں گی، ملک میں استحکام کا سوال ہی پیدا نہیں ہوتا، کراچی کے سیاسی حالات کیسے ہیں؟ وہاں کے عوام بخوبی واقف ہیں کہ ایم کیو ایم کو جعلی طریقے سے مسلط کیا گیا ہے۔
حافظ نعیم نے کہا کہ حکومت کی یہ ذمہ داری بنتی ہے کہ وہ عوام کو سستی ، معیاری تعلیم اور صحت کی سہولیات فراہم کرے، حکمران طبقہ خود کو تعلیم یافتہ کہلاتا ہے مگر عملی طور پر قوم کے بچوں کو جاہل بنانے کی کوشش کر رہا ہے۔
ان کا کہنا تھا کہ ریاست کا فرض ہے کہ عوام کو بنیادی سہولیات دے اور ملک میں امن و امان کو یقینی بنا ئے مگر ہماری بدقسمتی یہ ہے کہ عوام کو ریلیف دینے کے بجائے مزید بوجھ ڈا لا جا رہا ہے ۔
امیر جماعت اسلامی کا مزید کہنا تھا کہ حکومت عوامی مسائل کو حل کرنے کے لیے ہنگامی بنیادوں پر اقداما ت اٹھائے۔ ورنہ جماعت اسلامی عوامی سطح پر شدید احتجاج کرنے پر مجبور ہوگی۔
By 
