محکمہ موسمیات نے ملک کے جنوبی حصوں میں گرمی کی لہر جیسی صورتحال اور مختلف علاقوں میں بارش کی پیشگوئی کر دی۔
محکمہ موسمیات کے مطابق کل سے مغربی ہواؤں کا ایک نیا سلسلہ ملک کے بالائی علاقوں میں داخل ہو گا جس سے بارشیں ہونے کی توقع ہے۔
چترال، دیر، سوات، شانگلہ، کوہستان اور مانسہرہ سمیت ایبٹ آباد، بٹگرام، بونیر، باجوڑ اور گلگت بلتستان میں بارشیں ہونے کی پیشگوئی کی گئی ہے۔
پی ڈی ایم اے پنجاب نے بھی رواں ماہ درجہ حرارت میں اضافے اوربارشوں کا الرٹ جاری کردیا ہے، 8 اپریل سے 11 اپریل تک پنجاب کے بیشتر اضلاع میں گرد آلود ہوائیں، گرج چمک کے ساتھ بارش ہو سکتی ہے۔
ترجمان پی ڈی ایم اے کے مطابق راولپنڈی، مری، گلیات، اٹک، چکوال، منڈی بہاوالدین، گجرات، جہلم، گجرانوالہ میں تیز ہواؤں کے ساتھ بارش کی پیشگوئی ہے۔
لاہور، قصور، سیالکوٹ، نارووال، اوکاڑہ، فیصل آباد، ٹوبہ ٹیک سنگھ، جھنگ، خوشاب، سرگودھا اور میانوالی میں آندھی و بارشوں کے امکانات ہیں۔
رواں ماہ درجہ حرارت 4 سے 7 ڈگری تک معمول سے بڑھنے کا امکان ظاہر کیا گیا ہے، رواں ماہ سے پنجاب کے میدانی علاقوں میں گرمی کی شدت میں اصافہ ہو گا۔
ڈی جی پی ڈی ایم اے نے کہا ہے کہ وزیراعلی پنجاب کی ہدایت کے مطابق ضلعی انتظامیہ کو الرٹ جاری کر دیا ہے۔ گرمی اور لو کی شدت میں اضافے سے عوام الناس کو بھی محتاط رہنا ہو گا۔
پی ڈی ایم اے نے کہا ہے کہ دوپہر کے وقت کام کرنے والے لو سے بچنے کا اہتمام کریں۔ سکول ایجوکیشن ، محکمہ صحت آبپاشی تعمیر و مواصلات لوکل گورنمنٹ اور لایئو سٹاک کو بھی الرٹ جاری کر دیا گیا ہے۔
ڈی جی پی ڈی ایم اے عرفان علی کاٹھیا نے کہا کہ انفارمیشن ڈیپارٹمنٹ، واسا، پنجاب پولیس اور سول ڈیفنس کو بھی موسمی صورتحال کے پیش نظر الرٹ جاری کردیا گیا۔
شہری آسمانی بجلی سے تحفظ کیلئے محفوظ مقامات پر رہیں۔ عوام الناس بجلی کی گرج چمک اور طوفانی صورتحال میں کھلے آسمان تلے ہرگز نہ جائیں ۔
By 
