لاہور میں پھر سے بسنت منانے کا فیصلہ

لاہور میں بسنت اگلے سال فروری میں منانے کا فیصلہ کیا گیا ہے، بسنت کے ممکنہ انعقاد کے حوالے سے سفارشات تیار کرلی گئیں۔

تفصیلات کے مطابق لاہور میں پھر سے باقاعدہ طور پر بسنت منائے جائے گی، شاہی قلعے میں بسنت کے ممکنہ انعقاد کے حوالے سے بننے والی کمیٹی نے سفارشات تیار کرلی ہیں، سی سی پی او لاہور صدیق کمیانہ، کمشنر زید بن مقصود، ڈی جی والڈ سٹی کامران لاشاری و دیگر اس کمیٹی میں شریک ہیں۔

ذرائع نے بتایا کہ بسنت پر استعمال ہونے والی ڈور کے ٹیسٹ پی سی ایس آئی آر لیبارٹری سے کرائے جائیں گے، لیبارٹری سے پاس ہونے والے ٹیسٹ کے نمونہ جات کے مطابق ڈور تیار کی جائے گی۔

بسنت سے پہلے جون میں ڈور، پتنگ کی چیکنگ کیلئے کسی مقام پر ریہرسل ہوگی، بسنت کو کامیاب بنانے کیلئے ڈور اور پتنگ فروخت کرنے والوں کی رجسٹریشن ہوگی۔

ذرائع نے بتایا کہ بسنت کے موقع پر بغیرسیفٹی راڈ موٹرسائیکل پر 2 روز کیلئے پابندی عائد کی جائے گی، بسنت پر چرخی پرپابندی ہوگی، ڈور کے پنے اور ڈھائی تاوا گڈے کی اجازت ہوگی۔

اس حوالے سے ذرائع کا مزید کہنا تھا کہ بسنت پورے لاہور میں منانے کی اجازت ہوگی، بسنت پر غیرملکی سیاحوں کو بلانے کی حکمت عملی بنائی جائے گی۔