پاکستان کے کوہ پیما سرباز خان نے دنیا کی 8 ہزار میٹر سے بلند تمام چوٹیاں بغیر مصنوعی آکسیجن سر کر کے نئی تاریخ رقم کردی۔
گلگت بلتستان کے ضلع ہنزہ سے تعلق رکھنے والے کوہ پیما سرباز خان یہ کارنامہ انجام دینے والے پاکستان کے پہلے کوہ پیما بن گئے ہیں۔
پاکستانی کوہ پیما نے یہ سنگ میل 8 ہزار 586 میٹر بلند کینچن جونگا کو سر کر کے عبور کیا، وہ گزشتہ برس تمام 14 بلند چوٹیاں سر کر چکے تھے۔
سرباز خان نے 8 تھاوزنڈز کے ابتدائی سفر میں 2 چوٹیوں پر آکسیجن استعمال کیا تھا، ان کو تاریخی کارنامے کے لیے اناپورنا اور کینچن جونگا بغیر آکسیجن سر کرنا تھیں۔
انہوں نے گزشتہ ماہ اناپورنا اور آج کینچن جونگا بغیر آکسیجن سر کر کے تاریخی کارنامہ انجام دیا۔
سرباز خان کا تعلق گلگت بلتستان میں ہنزہ کے علاقے علی آباد سے ہے اور انہوں نے اپنے کوہ پیمائی کیرئیر کا آغاز 2016 میں کیا، 2019 میں وہ سپلیمنٹری آکسیجن کے استعمال کے بغیر نیپال میں 8 ہزار 516 میٹر بلند دنیا کے چوتھے بلند ترین پہاڑ ماؤنٹ لوٹسے کو سر کرنے والے پہلے پاکستانی بنے۔
By 
