پاکستان کے بڑے موبائل نیٹ ورک’’جاز‘‘ صارفین کے لئے اہم خبر

پاکستان میں ٹیلی کام سروس فراہم کرنے والی ملک کی سب سے بڑی کمپنی جاز (Jazz) نے ملک بھر میں اپنی نیٹ ورک اپگریڈیشن اور 5G سروسز کے آغاز کے لیے بڑے پیمانے پر منصوبہ بندی کا اعلان کر دیا ہے۔ کمپنی کے مطابق اس منصوبے کے تحت جدید ٹیکنالوجی کے ذریعے نیٹ ورک کو مزید مضبوط بنایا جائے گا تاکہ صارفین کو بہتر اور تیز رفتار انٹرنیٹ سہولیات فراہم کی جا سکیں۔

جاز کی جانب سے جاری کردہ تفصیلات کے مطابق کمپنی نے وسط اگست 2026 تک ملک بھر میں ایک ہزار (1,000) نیٹ ورک سائٹس کو 5G ٹیکنالوجی پر منتقل کرنے کا ہدف مقرر کیا ہے۔ اس کے علاوہ سال 2026 کے اختتام تک مجموعی طور پر ڈھائی ہزار (2,500) نیٹ ورک سائٹس کو جدید 5G نیٹ ورک کا حصہ بنانے کی منصوبہ بندی بھی کی گئی ہے۔

کمپنی کا کہنا ہے کہ اس بڑے انفراسٹرکچر منصوبے پر عملی پیش رفت کا آغاز کر دیا گیا ہے اور اسی مقصد کے لیے جدید ترین ٹیلی کام آلات کی درآمد بھی شروع کر دی گئی ہے۔ جاز کے مطابق جدید آلات کی تنصیب کے بعد نیٹ ورک کی مجموعی کارکردگی میں بہتری آئے گی اور صارفین کو زیادہ تیز، مستحکم اور بہتر معیار کی انٹرنیٹ سروسز میسر ہوں گی۔

یہ بھی پڑھیں: موبائل خریدنے سے پہلے یہ خبر ضرور پڑھیں، پی ٹی اے نے خبردار کر دیا

جاز نے مزید بتایا کہ نیٹ ورک اپگریڈیشن کے اس منصوبے سے نہ صرف بڑے شہری علاقوں کے صارفین مستفید ہوں گے بلکہ دیہی اور پسماندہ علاقوں میں بھی انڈور کوریج اور انٹرنیٹ کے معیار میں نمایاں بہتری متوقع ہے۔ کمپنی کے مطابق اس اقدام کا مقصد ملک بھر میں صارفین کو بہتر نیٹ ورک سہولیات فراہم کرنا اور جدید ڈیجیٹل تقاضوں سے ہم آہنگ انفراسٹرکچر تیار کرنا ہے۔

دوسری جانب ماہرین کا کہنا ہے کہ پاکستان میں 5G ٹیکنالوجی کے نفاذ سے مختلف شعبوں میں نمایاں ترقی کے امکانات پیدا ہوں گے۔ ان کے مطابق جدید 5G نیٹ ورک ڈیجیٹل معیشت کو فروغ دینے، آن لائن کاروبار کو وسعت دینے، ای لرننگ کے شعبے کو مضبوط بنانے، ٹیلی میڈیسن کی سہولیات کو بہتر کرنے اور جدید صنعتی شعبوں کی ترقی میں اہم کردار ادا کرے گا۔

جاز کی جانب سے 5G نیٹ ورک کی تیاریوں کو پاکستان کے ڈیجیٹل مستقبل کی جانب ایک اہم پیش رفت قرار دیا جا رہا ہے۔ کمپنی کے مطابق نیٹ ورک اپگریڈیشن کا یہ منصوبہ ملک میں جدید مواصلاتی نظام کی بہتری کی جانب اہم قدم ثابت ہوگا، جبکہ اس کے نتیجے میں تیز رفتار انٹرنیٹ کے نئے دور کے آغاز کی بھی توقع کی جا رہی ہے۔

یہ بھی پڑھیں: پانی قومی سلامتی کا بنیادی ستون قرار، پاکستان کا سندھ طاس معاہدے کے بھرپور تحفظ کے عزم کا اعادہ