لاہور،کاہنہ میں ٹیوشن سینٹر کی چھت گرنے سے 14 بچے جاں بحق ،علاقے میں کہرام،وزیر اعلیٰ کا نوٹس

لاہور،کاہنہ میں ٹیوشن سینٹر کی چھت  گر گئی  14 بچے جاں بحق ہو گئے ہیں ،چھت گرنے سے ٹیچر بھی زخمی ،میڈیا رپورٹس کے مطابق کاہنہ میں کچوانہ روڈ پر قائم ٹیوشن سینٹر کی چھت گر گئی 25 سے زائد بچے ملبے تلے دب گئے  بعد ازاں 14 بچے دم توڑ گئے ۔

افسوسناک حادثہ اور ابتدائی تفصیلات

 میڈیا رپورٹس کے مطابق لاہور کے علاقے کاہنہ میں کچوانہ روڈ پر ایک ٹیوشن اکیڈمی کی چھت گرنے سے افسوسناک حادثہ پیش آیا، جس کے نتیجے میں 14 بچوں کے جاں بحق ہونے کی تصدیق ہوئی ہے جبکہ متعدد بچے زخمی ہو گئے ہیں حادثہ اس وقت پیش آیا جب ٹیوشن سینٹر میں بچے زیرِ تعلیم تھے۔

چھت گرنے کے وقت بچوں کی موجودگی

اطلاعات کے مطابق چھت گرنے کے وقت تقریباً 35 بچے کلاس میں موجود تھے چھت مبینہ طور پر ٹی آر گارڈر پر مشتمل تھی جو اچانک گر گئی اور پورا کمرہ ملبے کا ڈھیر بن گیا۔

جاں بحق اور زخمی بچوں کی صورتحال

ہسپتال ذرائع کے مطابق جاں بحق ہونے والے بچوں میں مختلف عمروں کے طلبہ شامل ہیں، زخمیوں میں سے متعدد کی حالت تشویشناک بتائی جا رہی ہے جبکہ کئی بچوں کو فوری طبی امداد دی جا رہی ہے، کچھ بچوں اور ایک خاتون کی حالت خطرے سے باہر قرار دی گئی ہے۔

ریسکیو آپریشن اور امدادی کارروائیاں

حادثے کے فوراً بعد اہل محلہ اور ریسکیو 1122 کی ٹیمیں موقع پر پہنچ گئیں اور ملبہ ہٹانے کا عمل شروع کیا گیا، ریسکیو حکام کے مطابق متعدد بچوں کو ملبے سے نکال کر قریبی اسپتالوں میں منتقل کیا گیا ہے جبکہ آپریشن تاحال جاری ہے۔

ہسپتالوں میں ایمرجنسی نافذ

وزیر صحت کی ہدایت پر قریبی ہسپتالوں میں ایمرجنسی نافذ کر دی گئی ہے تاکہ زخمیوں کو فوری اور بہتر طبی سہولت فراہم کی جا سکےڈاکٹروں کی ٹیمیں مسلسل متاثرہ بچوں کے علاج میں مصروف ہیں۔

شناخت اور طبی صورتحال

ہسپتال انتظامیہ کے مطابق جاں بحق اور زخمی بچوں کی شناخت کا عمل جاری ہے۔ بعض زخمیوں کی حالت نازک بتائی جا رہی ہے جنہیں خصوصی نگہداشت میں رکھا گیا ہے۔

پولیس کارروائی اور گرفتاری

پولیس نے ٹیوشن سینٹر کے دو مالکان کو حراست میں لے لیا ہے جبکہ واقعے کی وجوہات اور ممکنہ غفلت کے پہلوؤں کی تحقیقات شروع کر دی گئی ہیں، مزید گرفتاریوں کے لیے چھاپے مارے جا رہے ہیں۔

وزیراعلیٰ پنجاب کا نوٹس

وزیراعلیٰ پنجاب مریم نواز نے واقعے کا نوٹس لیتے ہوئے امدادی کارروائیوں کو تیز کرنے کی ہدایت جاری کی ہے، انہوں نے متعلقہ حکام اور صوبائی وزرا کو جائے حادثہ پر موجود رہ کر ریسکیو آپریشن کی نگرانی کی ہدایت بھی کی ہے۔

واقعے کی سنگینی

ابتدائی اطلاعات کے مطابق حادثے کے وقت عمارت میں ممکنہ طور پر تعمیراتی کام بھی جاری تھا، تاہم حتمی وجوہات کا تعین تحقیقات کے بعد کیا جائے گا حکام کے مطابق صورتحال انتہائی افسوسناک ہے اور ریسکیو کارروائیاں مکمل ہونے تک حتمی اعداد و شمار میں تبدیلی ممکن ہے۔