آزاد کشمیر کی صورتحال کشمیر کاز اور پاکستان کی ساکھ کو نقصان پہنچا رہی ہے،بلاول بھٹو

بلاول بھٹو زرداری نے کہا ہے کہ آزاد کشمیر میں جاری بے چینی کشمیر کے مقدمے اور پاکستان کی نیک نامی کو نقصان پہنچا رہی ہے، انہوں نے کہا کہ اس صورتحال سے دشمن عناصر اور بھارت و اسرائیل کے گٹھ جوڑ کو اپنے مقاصد کے حصول کے لیے غیر ضروری فائدہ اٹھانے کا موقع مل رہا ہے۔

انہوں نے مظاہرین سے اپیل کی کہ وہ اپنا احتجاج پُرامن انداز میں ختم کریں اور تمام سیاسی شکایات اور اختلافات کا حل جمہوری، آئینی اور پُرامن ذرائع سے تلاش کیا جائے۔

بلاول بھٹو زرداری نے کہا کہ پاکستان پیپلز پارٹی قبل از وقت جاری کیے گئے انتخابی پروگرام کو واپس لینے کا مطالبہ کر چکی ہے، ان کا کہنا تھا کہ ان کی جماعت سیاسی حل کے حصول کے لیے پُرعزم ہے اور زیر التوا شکایات کے ازالے کے لیے حقائق اور مفاہمت کے کمیشن کے قیام کی کوشش کرے گی۔

یہ بھی پڑھیں :آزاد کشمیر حکومت کا ’کالعدم جے اے اے سی‘ کے ساتھ مذاکرات کا امکان مسترد ، معطل ایف آئی آرز بحال کر دی گئیں

انہوں نے مزید کہا کہ اگر وفاقی حکومت سمیت تمام فریق متفق ہوں تو آزاد کشمیر حکومت احتجاج کرنے والی جماعتوں سے متعلق جاری اعلانات کا ازسرِنو جائزہ لے سکتی ہے ، جن افراد نے کوئی غلط کام نہیں کیا، انہیں دوسروں کے اقدامات کے نتائج نہیں بھگتنا چاہئیں۔

ایران اور امریکہ کے درمیان ممکنہ معاہدے کے حوالے سے بلاول بھٹو زرداری نے کہا کہ اسلام آباد معاہدہ دستخط کے قریب پہنچنا ایک تاریخی لمحہ ہے اور اس وقت عالمی توجہ مضبوطی کے ساتھ پاکستان پر مرکوز ہے۔