پی سی بی نے پاک بنگلہ دیش ٹی ٹوئنٹی سیریز کیلئے ٹکٹوں کی قیمت کا اعلان کر دیا

پی سی بی نے پاک بنگلہ دیش ٹی ٹوئنٹی سیریز کیلئے ٹکٹوں کی قیمت کا اعلان کر دیا۔

پی سی بی کے مطابق شائقین کے لیے ٹکٹ 25 مئی سے صرف  ٹی سی ایس ایکسپریس سینٹرز پر دستیاب ہوں گے۔ پہلے مرحلے میں ٹکٹ اتوار سے ڈیوس روڈ اور گلبرگ لاہور میں واقع ٹی سی ایس ایکسپریس سینٹرز پر دستیاب ہوں گے۔

شائقین کو گراؤنڈ میں آنے کی ترغیب دینے کے لیے میچز کے لیے انتہائی مناسب قیمتیں مقرر کی گئی ہیں۔ قذافی اسٹیڈیم میں جنرل انکلوژرز (حنیف محمد، امتیاز احمد، انضمام الحق اور سعید احمد) کے ٹکٹ شائقین  200 روپے میں حاصل کر سکیں گے۔

پاکستان نے ایک اور محاذ پر بھارت کو شکست دے دی

فرسٹ کلاس انکلوژرز (عبدالحفیظ کاردار، عبدالقادر، جاوید میانداد اور سرفراز نواز) کا ٹکٹ 300 روپے میں دستیاب ہو گا، پریمیم انکلوژرز (راجاس اور سعید انور) کے ٹکٹ شائقین کے لیے 400 روپے (فی کس) میں دستیاب ہوں گے۔

وی آئی پی انکلوژرز (فضل محمود اور عمران خان) کا ٹکٹ شائقین کے لیے 500 روپے میں دستیاب ہو گا۔ جناح اینڈ پر ماجد خان اور ظہیر عباس (وی وی آئی پی انکلوژرز) اور اقبال اینڈ پر وقار یونس اور وسیم اکرم (وی وی آئی پی انکلوژرز) کے ٹکٹ شائقین کیلئے 2000 روپے میں دستیاب ہوں گے۔

شائقین 2000  روپے میں گیلری  باکس  سے بھی میچ دیکھ سکیں گے۔ شائقین ایک شناختی کارڈ پر زیادہ سے زیادہ چار ٹکٹ خرید سکتے ہیں۔ پاکستان اور بنگلہ دیش کے درمیان پہلا میچ 28 مئی کو کھیلا جائے گا۔