“ابھی تو کھیل باقی ہے” فخر زمان کاریٹائرمنٹ کے فیصلے پر بڑا اعلان

پاکستان کرکٹ ٹیم کے مایہ ناز اوپنر فخر زمان نے اپنی ریٹائرمنٹ کے حوالے سے گردش کرنے والی تمام قیاس آرائیوں کو ختم کرتے ہوئے مداحوں کو بڑی خوشخبری سنا دی ہے۔

بائیں ہاتھ کے جارح مزاج بلے باز نے ٹی ٹوئنٹی کرکٹ سے فوری ریٹائرمنٹ نہ لینے کا فیصلہ کیا ہے اور کھیل جاری رکھنے کا عزم ظاہر کیا ہے۔

فخر زمان کا کہنا ہے کہ انہوں نے ورلڈ کپ کے بعد ٹی ٹوئنٹی فارمیٹ سے کنارہ کشی اختیار کرنے کا سوچا تھا، تاہم اب اپنے اس فیصلے پر نظرثانی کر لی ہے اور فی الحال ریٹائرمنٹ کا کوئی ارادہ نہیں ہے۔

انہوں نے مزید کہا کہ وہ اپنی ٹی ٹوئنٹی کرکٹ کا اختتام ایک اچھے نوٹ پر کرنا چاہتے ہیں اور اسی مقصد کے لیے وہ مزید کرکٹ کھیلنے کا ارادہ رکھتے ہیں۔

فخر زمان اب تک پاکستان کی نمائندگی کرتے ہوئے 120 ٹی ٹوئنٹی انٹرنیشنل میچز کھیل چکے ہیں۔

انہوں نے ان میچوں میں مجموعی طور پر 2494 رنز اسکور کیے ہیں۔

 ان کے کیریئر میں اب تک 14 شاندار نصف سنچریاں شامل ہیں۔

 فخر زمان ٹی ٹوئنٹی انٹرنیشنل میں 99 چھکے لگانے والے پہلے پاکستانی بیٹر بن گئے ہیں، جو ان کی جارحانہ بیٹنگ کا منہ بولتا ثبوت ہے۔

مزید پڑھیں:یونس خان کی واپسی: پاکستان کرکٹ بورڈ میں اہم ذمہ داری ملنے کی توقع

فخر زمان کے اس فیصلے سے جہاں ان کے مداحوں میں خوشی کی لہر دوڑ گئی ہے، وہاں قومی ٹیم کے بیٹنگ لائن اپ کو بھی ان کے تجربے اور جارحانہ انداز سے مزید تقویت ملے گی۔