مسلم لیگ ن نے ہی دفاع کو مضبوط بنایا اور ایٹمی دھماکے کیے ، نواز شریف

مسلم لیگ ن کے قائد اور سابق وزیراعظم نواز شریف کا کہنا ہے کہ مسلم لیگ ن نے ہی دفاع کو مضبوط بنایا اور ایٹمی دھماکے کیے تھے۔ 

لندن میں میڈیا سے گفتگو کرتے ہوئے سابق وزیراعظم نواز شریف نے کہا  کہ ہم نے ہی چین کے ساتھ مل کر جے ایف سیونٹین تھنڈر طیارے بنائے تھے، پاکستان کو میزائل ٹیکنالوجی دی۔

انھوں نے کہا کہ الیکشن جیتنے پر اللہ کا شکر ادا کرتے ہیں، مسلم لیگ ن ملک کی ترقی میں اپنا کردار ادا کر رہی ہے، لوگ ہم پر اعتماد کر رہے ہیں، پچھلی حکومت نے ملک کا برا حال کر دیا تھا،  ملک بہتر ہو رہا ہے، معیشت مضبوط ہو رہی ہے، لوگ کام کو ہی ووٹ دیتے ہیں۔

یہ بھی پڑھیں : بجٹ 2025- 26پر پاکستان اور آئی ایم ایف مذاکرات کے ایک اور دورکا امکان، دفاعی بجٹ اور سبسڈی پربات جاری

نواز شریف نے کہا کہ ہمارے زمانے میں 4 سال تک روپیہ مستحکم رہا، شرح نمو 7  کو چھو رہی تھی۔

انہوں نے کہا کہ پچھلی حکومت نے جو ملک کا حال کیا تھا مسلم لیگ بتدریج اسے بہتر بنارہی ہے،ہر چیز استحکام کی جانب واپس لوٹ رہی ہے۔

واضح رہے سابق وزیراعظم میاں نواز شریف خصوصی طیارے کے ذریعہ پاکستان سے لندن کے لوٹن ایئرپورٹ پہنچے ہیں جہاں ان کے ہمراہ صاحبزادے حسن نواز اور ان کے ذاتی معالج بھی ہیں، لندن قیام کے دوران سابق وزیراعظم اپنا مکمل طبی معائنہ بھی کرائیں گے۔

 سابق وزیراعظم نوازشریف عیدالاضحیٰ بھی لندن میں منائیں گے۔