وزیراعلیٰ پنجاب مریم نواز کی زیر صدارت پنجاب کابینہ کا اجلاس ہوا جس میں پنجاب جرنلسٹ ہاؤسنگ فاؤنڈیشن کے فیز 2 کے لیے روڈا (راوی اربن ڈیولپمنٹ اتھارٹی) کی جانب سے اراضی کے حصول کے لیے 40 کروڑ روپے کی گرانٹ کی منظوری دی گئی۔
گرانٹ کی منتقلی کو کابینہ سے فوری منظوری بھی مل گئی۔ اجلاس میں سینیئر وزیر مریم اورنگزیب، وزیر اطلاعات عظمت بخاری اور کابینہ کے دیگر ارکان نے شرکت کی۔
وزیراطلاعات عظمیٰ بخاری نے کیس پیش کیا جس کی وزیراعلیٰ مریم نواز اور کابینہ نے فوری طور پر توثیق کی۔
کابینہ نے پنجاب حکومت کے ہیلی کاپٹر، پنجاب سینیئر سٹیزن ویلفیئر بل اور چائلڈ پروٹیکشن پالیسی کی بھی منظوری دی۔
واضح رہے کہ اس سے قبل وزیر اعلیٰ پنجاب مریم نواز شریف نے صوبے بھر میں غیر قانونی ہاؤسنگ سوسائٹیوں کا دیرینہ مسئلہ حل کرنے کے لیے ایک بڑا قدم اٹھانے کا اعلان کیا تھا۔ انہوں نے ایک اعلیٰ سطح کے اجلاس کی صدارت کی جہاں یہ فیصلہ کیا گیا کہ ان اسکیموں کو باقاعدہ بنانے کے لیے ایک مناسب نظام متعارف کرایا جائے گا۔
مریم نواز نے کہا تھا کہ غیر قانونی ہاؤسنگ سوسائٹیوں سے ہزاروں افراد متاثر ہوئے ہیں جنہوں نے عوام سے پیسے لیے لیکن پلاٹ دینے میں ناکام رہے۔ انہوں نے کہا کہ ’یہ لوگوں، خاص طور پر غریبوں کے ساتھ ایک بہت بڑی ناانصافی ہے، جنہوں نے اپنی زندگی بھر کی بچت سے ان معاشروں پر بھروسا کیا‘۔
اجلاس کے دوران انکشاف کیا گیا تھا کہ پنجاب میں مجموعی طور پر7 ہزار905 ہاؤسنگ سوسائٹیاں ہیں جو تقریباً 20 لاکھ کنال اراضی پر محیط ہیں۔ ان میں سے صرف 2,687 منظور شدہ ہیں، جبکہ 5،100 سے زیادہ یا تو غیر قانونی ہیں یا اب بھی منظوری کے منتظر ہیں۔
By 
