ہر بے گناہ پاکستانی کے خون کا بدلہ ضرور لیا جائے گا، فیلڈ مارشل عاصم منیر کی قوم کو یقین دہانی

فیلڈ مارشل سید عاصم منیر نے قوم کو یقین دہانی کرائی ہے کہ ہر بے گناہ پاکستانی کے خون کا بدلہ ضرور لیا جائے گا۔

 فیلڈ مارشل سید عاصم منیر نے کور ہیڈ کوارٹرز پشاور کا دورہ کیا، ارمی چیف کو کور ہیڈ کوارٹرز پشاور میں انسداد دہشت گردی آپریشنز اور سیکورٹی صورتحال پر بریفنگ دی گئی۔

فیلڈ مارشل نے بنوں چھاونی پر حملے میں شہید ہونے والوں کی نماز جنازہ میں شرکت کی، انہوں نے بنوں سی ایم ایچ کا دورہ کر کے زخمیوں کی عیادت کی، فیلڈ مارشل نے سیکیورٹی فورسز کے بے مثال حوصلے اور عزم کو زبردست خراجِ تحسین پیش کیا۔

انہوں نے کہا کہ سیکورٹی فورسز بھارتی سرپرستی میں سرگرم فتنہ خوارج کا مردانہ وار مقابلہ اور انہیں بے نقاب کر رہی ہیں، پاکستانی قوم دہشت گردی کے مکمل خاتمے کے لئے پرعزم ہے، انہوں نے دہشت گردی کے خلاف ریاست کے غیر متزلزل عزم کا اعادہ کیا۔

بہار میں خفیہ این آر سی؟ اسد الدین اویسی کا انتخابی کمیشن پر سنگین الزام

فیلڈ مارشل سید عاصم منیر نے کہا کہ دہشت گردی کے تمام سہولت کاروں، معاونین اور مجرموں کو بغیر کسی رعایت انصاف کے کٹہرے میں لایا جائے گا، انہوں نے کہا کہ خطے میں دہشت گردی کے اصل چہرے کو پوری دنیا کے سامنے بے نقاب کیا جائے گا۔

فیلڈ مارشل نے قوم کو یقین دہانی کراتے ہوئے کہا کہ ہر بے گناہ پاکستانی کے خون کا بدلہ ضرور لیا جائے گا، پاکستان کے داخلی استحکام کو نقصان پہنچانے کی ہر کوشش کا فوری اور فیصلہ کن جواب دیں گے۔

فیلڈ مارشل نے خاص طور پر خیبر پختونخوا پولیس سمیت سویلین قانون نافذ کرنے والے اداروں کی استعداد کار میں اضافے کی اہمیت پر زور دیا، ان کا کہنا تھا کہ متعلقہ حکومتی سٹیک ہولڈرز اداروں کی استعداد کار میں اضافے کی کوششوں کو ترجیح دیں۔

انہوں نے پاک فوج کی طرف سے اداروں کی صلاحیتوں کو بڑھانے میں ہر ممکن تعاون کی بھی یقین دہانی کرائی، کور ہیڈکوارٹر پہنچنے پر چیف آف آرمی اسٹاف کا استقبال کور کمانڈر پشاور نے کیا۔