بھارتی ریاست اڑیسہ میں مذہبی تقریب میں بھگدڑ، 3 افراد ہلاک ، 50 زخمی

بھارت کے ایک مندر کے باہر مذہبی رسومات کے دوران بھگدڑ مچنے سے کم از کم تین افراد ہلاک اور 50 سے زائد زخمی ہو گئے ہیں۔

بھارتی میڈیا کی رپورٹ کے مطابق  واقعہ اتوار کو علی الصبح چار بجے اس وقت پیش آیا جب سینکڑوں کی تعداد میں یاتری مندر کے قریب جمع تھے۔

واقعہ ریاست اوڑیسہ کے علاقے پوری رتھ یاترا میں اس وقت پیش آیا جب دیوتاؤں جگن ناتھ، بالابھدرا اور دیوی شوبھادرا کی مورتیاں لانے والی گاڑی جگن ناتھ مندر سے تقریباً تین کلومیٹر دور شری گنڈیچا کے مندر کے قریب سے گزر رہی تھی اور یہیں سے یاترا کا سلسلسہ شروع ہوا تھا۔

یہ بھی پڑھیں : سیکولر بھارت خطرے میں، راہول گاندھی نے آر ایس ایس ،بی جے پی کے عزائم بے نقاب کردیے

ان کے مطابق زخمی افراد کو ہسپتال پہنچا دیا گیا ہے جن میں سے چھ کی حالت تشویشناک ہے۔

حکام کا کہنا ہے کہ لاشوں کو پوسٹ مارٹم کے لیے بھیج دیا گیا ہے اور اس بات کی تحقیقات بھی کی جا رہی ہے کہ بھگدڑ مچنے کی وجہ کیا تھی۔

خیال رہے انڈیا میں مذہبی رسومات کی ادائیگی کے دوران پہلے بھی اس قسم کے واقعات پیش آتے رہے ہیں۔

گزشتہ ماہ مغربی ساحلی ریاست گوا کے ایک مندر میں بھگدڑ مچنے سے چھ افراد ہلاک جبکہ 55 زخمی ہوئے تھے۔

اسی طرح جنوری کے اواخر میں اترپردیش کے پریاگ راج میں ہونے والے کمبھ میلے میں بھگدڑ مچنے سے کم سے کم 30 افراد ہلاک ہوئے تھے۔