ایلون مسک کا نئی سیاسی جماعت ’’امریکا پارٹی‘‘ بنانے کا اعلان

دنیا کے معروف کاروباری شخصیت اور ٹیسلا کے سی ای او ایلون مسک نے ایک نئی سیاسی جماعت ’امریکا پارٹی‘ کے قیام کا اعلان کردیا۔

عالمی میڈیا رپورٹس کے مطابق ایلون مسک نے اس جماعت کا اعلان اپنے سوشل میڈیا پلیٹ فارم ’ایکس‘ پر کیا جس میں انہوں نے اسے امریکا میں رائج دو بڑی جماعتوں ریپبلکن اور ڈیموکریٹ کے روایتی نظام کا متبادل قرار دیا۔

اپنے پیغام میں مسک نے کہا کہ موجودہ نظام نے ملک کو کرپشن اور بدانتظامی کے ذریعے تباہی کی طرف دھکیل دیا ہے اور اب وقت آ گیا ہے کہ ہم ایسی قیادت سامنے لائیں جو صرف طاقتور طبقے کی نہیں بلکہ عوام کی خدمت کرے۔

By a factor of 2 to 1, you want a new political party and you shall have it!

When it comes to bankrupting our country with waste & graft, we live in a one-party system, not a democracy.

Today, the America Party is formed to give you back your freedom. https://t.co/9K8AD04QQN

— Elon Musk (@elonmusk) July 5, 2025

ان کا کہنا ہے کہ ’امریکا پارٹی‘ کو اس مقصد کے تحت تشکیل دیا گیا ہے کہ وہ عوام کو حقیقی آزادی اور بااختیار بنانے کے لیے عملی اقدامات کرے۔

تاہم فی الحال یہ واضح نہیں ہو سکا ہے کہ آیا یہ جماعت انتخابی اداروں کے پاس باقاعدہ رجسٹرڈ ہے یا نہیں اور نہ ہی اس پارٹی کی قیادت یا تنظیمی ڈھانچے کے بارے میں کوئی تفصیل سامنے آئی ہے۔

امریکا میں یومِ آزادی کا جشن، ڈونلڈ ٹرمپ نے متنازع ٹیکس اور اخراجات کے بل پر دستخط کر دیے

ایلون مسک کی جانب سے یہ اعلان ایک ایسے وقت میں سامنے آیا ہے جب ان کے اور صدر ڈونلڈ ٹرمپ کے درمیان سیاسی اور معاشی پالیسیوں پر شدید اختلافات دیکھنے میں آئے تھے۔

مسک نے ٹرمپ کی معاشی پالیسیوں اور ٹیکس اصلاحات پر کھل کر تنقید کی تھی، جس کے بعد دونوں کے تعلقات میں کشیدگی پیدا ہوئی تھی۔

یاد رہے کہ ایلون مسک نے ڈونلڈ ٹرمپ کی انتخابی مہم پر کروڑوں ڈالر خرچ کیے تھے اور ٹرمپ انتظامیہ میں 129 دن کام کرنے کے بعد علیحدگی اختیار کرلی تھی۔