سابق پاکستانی فوجی سربراہ جنرل اشفاق کیانی سے متعلق بھارتی پروپیگنڈا بے نقاب

بھارتی خفیہ ایجنسی را سے منسلک ایکس اکاؤنٹ “بابا بناراس”سابق پاکستانی فوجی سربراہ جنرل اشفاق پرویز کیانی کے بارے میں جھوٹے دعوے  پر اتر آیا ،آزاد فیکٹ چیک حقیقت سامنے لے آیا۔

آزاد فیکٹ چیک نے بھارت سے چلائے جانے والے ایکس اکاؤنٹ “بابا بناراس” کی جانب سے کیے گئے جھوٹے دعوے کی تردید کی ہے، جس میں سابق پاکستانی فوجی سربراہ جنرل اشفاق پرویز کیانی کو ہدف بنایا گیا تھا۔

وائرل ہونے والی پوسٹ میں دعویٰ کیا گیا تھا کہ جنرل کیانی نے ریٹائرمنٹ کے بعد آسٹریلیا کے قریب 300 ملین ڈالر میں ایک جزیرہ خریدا ہے، جو پاکستانی روپے میں 85,249,680,000 بنتا ہے،  پوسٹ میں مزید کہا گیا تھا کہ اگر پاکستان فوج کے سربراہ کی سب سے زیادہ تنخواہ کے مطابق حساب کیا جائے، تو انہیں اس رقم کو بچانے کے لیے 340,998.72 سال تک فوجی سربراہ کے طور پر کام کرنا پڑے گا۔

آزاد فیکٹ چیک نے اس دعوے کی تردید کرتے ہوئے کہا ہے کہ جنرل کیانی کے پاس آسٹریلیا کے قریب کوئی جزیرہ نہیں ہے۔ اس دعوے کو ثابت کرنے کے لیے کوئی ثبوت موجود نہیں،  حقیقت میں، یہ ایک پرانی جھوٹی خبر ہے جس کی کئی بار تردید کی جا چکی ہے۔

Azaad Fact Check has debunked misinformation spread by an India-based X handle, Baba Banaras, regarding General Ashfaq Parvez Kayani. Contrary to their claims, General Kayani does not own any island near Australia. Baba Banaras is notorious for disseminating false information and… https://t.co/aeL9mIs1eW pic.twitter.com/zbCj81JW3U

— Azaad Fact Check (@azaadfactcheck) July 7, 2025

“بابا بناراس” اکاؤنٹ کو پاکستان کے خلاف غلط معلومات پھیلانے کے لیے جانا جاتا ہے اور اس کا ریکارڈ جھوٹے یا گمراہ کن مواد پوسٹ کرنے کا ہے۔

 آزاد فیکٹ چیک کے مطابق یہ دعویٰ پاکستانی حکام کے بارے میں جھوٹی خبریں پھیلانے کے ایک وسیع تر رجحان کا حصہ ہے، اور اس میں جنرل کیانی کو جزیرہ خریدنے سے جوڑنے کے لیے کوئی مالی یا قانونی شواہد موجود نہیں ہیں۔

بھارت جھوٹے پروپپیگنڈے میں مصروف، جنرل ساحر شمشاد مرزا کے کینیڈین شہریت لینے کی جھوٹی خبر چلا دی

قبل ازیں آزاد فیکٹ چیک نے پاکستان کے چیئرمین جوائنٹ چیفس آف اسٹاف کمیٹی (CJCSC)، جنرل ساحر شمشاد مرزا سے متعلق بھی ایک بھارتی پراپیگنڈا بے نقاب کیا تھا جس میں بھارت سے چلائے جانے والے ایکس (X) اکاؤنٹس نے یہ دعوی کیاتھا کہ جنرل ساحر شمشاد مرزا نے کینیڈا کی شہریت حاصل کر لی ہے۔

یہ جھوٹا دعویٰ بھارتی حفیہ ایجنسی را سے وابستہ  ‘بابا بنارس’ نامی ایکس اکاؤنٹ کی جانب سے کیا گیا جو کہ بھارت سے تعلق رکھتا ہے اور جعلی خبروں و غلط معلومات کا معروف ذریعہ ہے۔

آزاد فیکٹ چیک نے ان تمام دعووں کو جھوٹا اور بے بنیاد قرار دیتے ہوئے واضح کیا ہے کہ جنرل ساحر شمشاد مرزا پاکستانی شہری ہیں اور ان کے کینیڈین شہریت حاصل کرنے کا کوئی ثبوت موجود نہیں ہے۔

آزاد فیکٹ چیک کی تحقیق اس بات کو ثابت کرتی ہے کہ بھارتی ذرائع سے پھیلائی جانے والی جھوٹی خبریں محض من گھڑت افواہیں ہیں جو پاکستانی فوجی حکام کے خلاف منفی پروپیگنڈہ پھیلانے کے لیے استعمال کی جا رہی ہیں،  اس قسم کی جھوٹ پر مبنی معلومات نہ صرف بین الاقوامی سطح پر غلط فہمیاں پیدا کرتی ہیں، بلکہ یہ عوامی رائے کو گمراہ کرنے کی کوشش بھی کرتی ہیں۔