پانچ اگست کے مقابلے میں 90 دن کا پلان کہاں سے آیا ؟عالیہ حمزہ اپنی ہی قیادت پر برس پڑیں

پاکستان تحریک انصاف پنجاب کی چیف آرگنائزر عالیہ حمزہ نے خیبرپختونخوا کے وزیراعلیٰ علی امین گنڈا پور کے تحریک کے اعلان پر سوال اٹھاتے ہوئے کہا ہے کہ 5 اگست کے پلان کے مقابلے میں 90 دن کی تحریک کا تصور کہاں سے سامنے آیا؟

پی ٹی آئی کی مرکزی قیادت کے لاہور میں ہونے والے اہم اجلاس میں پنجاب کی چیف آرگنائزر عالیہ حمزہ کو نظر انداز کیے جانے پر انہوں نے ردعمل دیتے ہوئے اجلاس میں کیے گئے فیصلوں پر شکوک و شبہات ظاہر کیے اور متعدد سوالات اٹھائے۔

عالیہ حمزہ نے سوشل میڈیا پر طنزیہ انداز میں تبصرہ کرتے ہوئے لکھا کہ میرے متعلق موصول ہونے والی کچھ اطلاعات کے مطابق میں گزشتہ دو دنوں سے انتہائی مصروف رہی ہوں، ایسی مصروفیات جن سے میں خود بھی لاعلم ہوں۔ کیا کوئی اس پر روشنی ڈال سکتا ہے؟ان کا کہنا تھا کہ عمران خان کی رہائی کے لیے اعلان کردہ حکمت عملی کے بارے میں کب اور کہاں اعلان ہوا؟

ویسے تو میرے تک پہنچنے والی کچھ اطلاعات کے مطابق میں پچھلےدو دن سے بہت مصروف تھی 🫣
ایسی مصروفیات جن کا شاید مجھے بھی عمل نہیں تھا!
کیا کوئی روشنی ڈالے گا؟
وزیراعظم خان کی رہائی کے لیے کس لائحہ عمل کا کل یا آج اعلان ہوا ہے؟
تحریک کہاں سے اور کیسے چلے گی؟
5اگست کے مقابلے میں 90…

— Aliya Hamza Malik (@aliya_hamza) July 13, 2025

تحریک کی ابتدا کہاں سے اور کس طریقے سے کی جا رہی ہے؟ عالیہ حمزہ نے مزید کہا کہ اگر کسی کو علم ہو کہ 90 روزہ تحریک کی منصوبہ بندی کب اور کس بنیاد پر ہوئی تو میری بھی رہنمائی کریں، کیونکہ 5 اگست کے پلان کے برعکس یہ نیا پلان کہاں سے آیا، یہ واضح نہیں۔

انہوں نے یہ بھی زور دیا کہ تمام تر توجہ اور مرکز صرف اور صرف عمران خان کی رہائی پر ہونا چاہیے، اور ہمارا نعرہ بھی ایک ہی ہونا چاہیے۔یاد رہے کہ پی ٹی آئی کی مرکزی قیادت کے لاہور اجلاس کے بعد وزیراعلیٰ خیبرپختونخوا علی امین گنڈا پور نے میڈیا سے بات کرتے ہوئے عمران خان کی رہائی کے لیے 90 دن کی تحریک کا اعلان کیا تھا۔