لارڈز ٹیسٹ: انگلینڈ نے بھارت کو سنسنی خیز مقابلے کے بعد شکست دیدی

کپتان بین اسٹوکس اور جوفرا آرچر نے 3، 3 وکٹیں لے کر فتح میں کلیدی کردار ادا کیا، انگلینڈ کو سیریز میں 1-2 سے برتری

تفصیلات کے مطابق انگلینڈ نے بھارت کو تیسرے ٹیسٹ میں سنسنی خیز مقابلے کے بعد 22 رنز سے شکست دے کر سیریز میں 1-2 سے برتری حاصل کرلی۔ لارڈز میں کھیلے گئے ٹیسٹ کے آخری روز بھارت کی جانب سے رویندرا جڈیجا کی مزاحمت چائے کے وقفے کے بعد تک جاری رہی۔ تاہم، وہ ٹیم انڈیا کو ناقابلِ شکست 61 رنز کے باوجود فتح سے ہمکنار نہ کر پائے۔

پانچویں روز رشبھ پنت اور کے ایل راہول نے 58 رنز 4 وکٹ کے نقصان پر کھیل کی شروعات کی تو جیت کیلئے بھارت کو 135 رنز اور انگلینڈ کو 6 وکٹیں درکار تھیں۔ رشبھ پنت 9 رنز بناکر آؤٹ ہوگئے جس کے کچھ ہی دیر بعد کے ایل راہول بھی 39 رنز پر پویلین لوٹ گئے، واشنگٹن سندر کھاتا کھولے بغیر آؤٹ ہوگئے، نتیش کمار ریڈی 13 رنز بناسکے۔

جسپریت بمراہ اور محمد سراج نے بالترتیب 54 گیندوں پر 5 اور 30 گیندوں پر 4 رنز اسکور کر کے رویندرا جڈیجا کے ساتھ نویں اور دسویں وکٹ کی شراکت میں خوب مزاحمت کی۔ لیکن فتح سے 22 رنز پہلے مزاحمت دم توڑ گئی۔

مزید پڑھیں: اجیت ڈوول دنیا بھرمیں مذاق بن گیا ، بھارتی صحافیوں نے ثبوتوں کے ساتھ اجیت ڈوول کے جھوٹے بیان پر آئینہ دکھا دیا

انگلینڈ کی جانب سے کپتان بین اسٹوکس اور جوفرا آرچر نے 3، 3 کھلاڑیوں کو آؤٹ کیا۔ برائڈن کارس نے 2 اور شعیب بشیر اور کرس ووکس نے 1، 1 وکٹ حاصل کی۔