ملک بھر میں مزید موسلادھار بارشوں کی پیشگوئی، محکمہ موسمیات نے الرٹ جاری کردیا

کراچی: ملک کے چاروں صوبوں، کشمیر اور گلگت بلتستان میں موسلا دھار بارشوں کا امکان ظاہر کیا گیا ہے۔ محکمہ موسمیات کے مطابق آج رات سے تیز ہواؤں اور گرج چمک کے ساتھ مزید بارشوں کا سلسلہ شروع ہونے والا ہے۔

محکمہ موسمیات نے آئندہ دنوں کے لیے مون سون کے ایک اور اسپیل کا الرٹ جاری کرتے ہوئے بتایا کہ سندھ میں آج رات سے 20 جولائی کے دوران تھرپارکر، عمرکوٹ، مٹھی، حیدرآباد، بدین، ٹھٹہ، کراچی، خیرپور، جیکب آباد، دادو، کشمور، بے نظیر آباد، سانگھڑ، سکھر، گھوٹکی اور دیگر علاقوں میں موسلا دھار بارشوں کا امکان ہے۔

خیبرپختونخوا میں 21 جولائی سے 25 جولائی کے درمیان دیر، سوات، کوہستان، مالاکنڈ، شانگلہ، بٹگرام، کوہاٹ، ٹانک، ڈی آئی خان، باجوڑ، مہمند، خیبر، وزیرستان، مانسہرہ، ایبٹ آباد، ہری پور، پشاور، چارسدہ، مردان، صوابی اور ہنگو میں بارشوں کی پیشگوئی کی گئی ہے، جبکہ بعض مقامات پر شدید بارشیں بھی متوقع ہیں۔

پنجاب میں 20 جولائی کی شام سے 25 جولائی کے دوران اسلام آباد، راولپنڈی، اٹک، جہلم، گجرات، لاہور، گوجرانوالہ، شیخوپورہ، نارووال، سیالکوٹ، ساہیوال، جھنگ، ٹوبہ ٹیک سنگھ، چنیوٹ، خوشاب، اوکاڑہ، سرگودھا، بھکر اور میانوالی سمیت جنوبی پنجاب کے مختلف علاقوں میں بارش کا امکان ہے۔

یہ بھی پڑھیں: بھارتی سوشل میڈیا پر چہان ڈیم راولپنڈی کے منہدم ہونے کی جھوٹی خبر بے نقاب

بلوچستان میں 18 سے 19 جولائی کے دوران اور پھر 21 سے 23 جولائی کے دوران لسبیلہ، آواران، خضدار، کوئٹہ، ژوب، قلعہ سیف اللہ، زیارت، قلات، شیرانی، موسیٰ خیل، لورالائی اور بارکھان میں بارشوں کی توقع ہے۔

محکمہ موسمیات نے خبردار کیا ہے کہ اسلام آباد، راولپنڈی، خیبرپختونخوا، شمال مشرقی پنجاب اور کشمیر کے مقامی ندی نالوں میں طغیانی کا خطرہ ہے، جبکہ اسلام آباد، راولپنڈی، گوجرانوالہ، لاہور، سیالکوٹ، سرگودھا، فیصل آباد، اوکاڑہ، نوشہرہ اور پشاور کے نشیبی علاقے زیر آب آ سکتے ہیں۔

اس کے علاوہ خیبرپختونخوا، مری، گلیات، کشمیر اور گلگت بلتستان میں لینڈ سلائیڈنگ کے باعث سڑکوں کی بندش کا خدشہ بھی ظاہر کیا گیا ہے۔ محکمہ موسمیات نے شہریوں کو ہدایت کی ہے کہ درختوں، سولر پینلز، کمزور انفرااسٹرکچر اور پانی والے مقامات سے دور رہیں۔

یہ بھی پڑھیں: پنجاب میں شدید بارشیں، وزیراعلیٰ مریم نواز کی ہدایت پر رین ایمرجنسی نافذ