سندھ کے ضلع ٹنڈو اللہ یار سے تیل و گیس کا ذخیرہ دریافت

پاکستان کو تیل کے ذخائر کی تلاش میں بڑی کامیابی مل گئی ہے ، جس سے یومیہ 275 بیرل خام تیل حاصل ہونے کی توقع ہے۔

تفصیلات کے مطابق آئل اینڈ گیس ڈیولپمنٹ کمپنی لمیٹڈ (او جی ڈی سی ایل) کو سندھ کے ضلع ٹنڈو الہ یار میں واقع چاکرون آئل فیلڈ سے تیل کی ایک اور کامیاب دریافت ہوئی ہے۔

کمپنی کی جانب سے جاری کردہ اعلامیہ کے مطابق نئی دریافت چاکرون فیلڈ میں کی گئی 1926 میٹر گہرائی کی کھدائی کے بعد ممکن ہوئی۔

یہ بھی پڑھیں : وفاقی حکومت نے پیٹرول اور ڈیزل پر لیوی ٹیکس میں اضافہ کر دیا

اعلامیہ میں کہا گیا ہے کہ چاکرون آئل فیلڈ سے یومیہ 275 بیرل خام تیل حاصل ہونے کی توقع ہے، جو ملکی تیل کی پیداوار میں قابلِ ذکر اضافہ کرے گا۔

او جی ڈی سی ایل نے بتایا کہ چاکرون آئل فیلڈ میں یہ اس کی تیرہویں کامیاب دریافت ہے، جو کمپنی کی مسلسل کاوشوں اور جدید ٹیکنالوجی کے استعمال کا نتیجہ ہے۔

یہ بھی پڑھیں : گاڑی مالکان ہوشیار ! سخت ترین قانونی شکنجہ تیار کرلیا گیا

کمپنی نے مزید بتایا کہ اس منصوبے میں او جی ڈی سی ایل کے 95 فیصد جبکہ گورنمنٹ ہولڈنگز لمیٹڈ کے 5 فیصد شیئرز ہیں۔

حکام کے مطابق یہ دریافت نہ صرف ملکی توانائی کے شعبے کے لیے ایک اچھی خبر ہے بلکہ مقامی ترقی اور روزگار کے نئے مواقع بھی پیدا کرے گی۔

او جی ڈی سی ایل  کا کہنا ہے کہ  یہ دریافت TAY بلاک میں کمپنی کی 13ویں کامیاب دریافت ہے، جو مشترکہ منصوبے کی کوششوں اور علاقے کے وسائل کی تلاش کی مسلسل جدوجہد کو ظاہر کرتی ہے۔

یہ بھی پڑھیں : گھریلو گیس کنکشنز پر عائد پابندی ختم کرنے کا فیصلہ

 کمپنی کا ماننا ہے کہ یہ نتائج علاقے کی جیالوجیکل ممکنات پر اعتماد میں اضافہ کریں گے اور مزید تلاش و تحقیق کے لیے بنیاد فراہم کریں گے۔