فٹنس سرٹیفکیٹ : گاڑی مالکان کے لیے بڑی خبر آگئی

کراچی: سندھ کابینہ نے واہ انڈسٹریز کو گاڑیوں کی فٹنس سرٹیفکیشن کا اختیار دینے کی اصولی منظوری دے دی۔

تفصیلات کے مطابق وزیراعلیٰ سندھ سید مراد علی شاہ کی زیر صدارت کابینہ کا اجلاس ہوا، جس میں یومِ آزادی کی تقریبات سمیت دیگر اہم امور پر تبادلہ خیال کیا گیا۔

سینئر وزیر شرجیل انعام میمن نے گاڑیوں کے فٹنس انسپیکشن سینٹر کے قیام کے حوالے سے کابینہ کو بریفنگ دیتے ہوئے بتایا کہ اس وقت سندھ میں 92 لاکھ (9.2 ملین) گاڑیاں رجسٹرڈ ہیں۔

انہوں نے بریفنگ میں بتایا کہ فٹنس کے معیاری نظام کی عدم موجودگی کے باعث گاڑیوں کی مؤثر فزیکل انسپیکشن ممکن نہیں ہو رہی۔ محکمہ ٹرانسپورٹ سندھ نے ڈیجیٹائزڈ موٹر وہیکل انسپیکشن سسٹم متعارف کرا دیا ہے، جس کے تحت اب فٹنس سرٹیفکیٹس میں کیو آر کوڈ شامل کیا گیا ہے جبکہ رجسٹریشن اور چالان کی ادائیگی کا نظام بھی آن لائن کر دیا گیا ہے۔ اب تک 33 ہزار سے زائد گاڑیوں کو فٹنس سرٹیفکیٹ جاری کیا جا چکا ہے۔

یہ بھی پڑھیں: بحریہ ٹاؤن کی 6 میں سے 3 پراپرٹیز کی نیلامی کر دی گئی

ذوالفقار آباد آئل ٹرمینل، ملیر، ابراہیم حیدری اور کورنگی میں فٹنس کے لیے جدید آلات نصب کیے گئے ہیں۔

اجلاس میں تجویز دی گئی کہ محکمہ ٹرانسپورٹ گاڑیوں کی فٹنس کا کام واہ انڈسٹریز لمیٹڈ کو سونپنا چاہتا ہے۔ وزیر ٹرانسپورٹ نے واضح کیا کہ فٹنس سرٹیفکیٹ صرف کمرشل اور ہیوی گاڑیوں کے لیے جاری کیے جائیں گے، اور کراچی میں پانچ مقامات پر فٹنس سینٹرز قائم کیے جائیں گے جبکہ حیدرآباد، سکھر، لاڑکانہ، میرپورخاص اور شہید بینظیر آباد میں بھی فٹنس سینٹرز بنائے جا رہے ہیں۔

سندھ کابینہ نے واہ انڈسٹریز کو گاڑیوں کی فٹنس سرٹیفکیشن کے لیے اصولی منظوری دے دی، جبکہ وزیراعلیٰ سندھ نے محکمہ ٹرانسپورٹ کو ہدایت دی کہ واہ انڈسٹریز سے مشاورت کے بعد نیا پروپوزل کابینہ میں پیش کیا جائے۔

یہ بھی پڑھیں: بجلی صارفین کے لیے اگلے تین ماہ کے بلوں کے حوالے سے بڑی خبر