“اپنا میٹر اپنی ریڈنگ” مہم کو زبردست کامیابی، 10 لاکھ سے زائد صارفین مستفید

پاکستان بھر میں جاری “اپنا میٹر اپنی ریڈنگ” مہم کو غیر معمولی پذیرائی حاصل ہو رہی ہے اور اب تک 10 لاکھ سے زائد صارفین اس سہولت سے فائدہ اٹھا چکے ہیں۔

ترجمان وزارت توانائی کے مطابق، یہ اقدام حکومت کی اُس جامع حکمتِ عملی کا حصہ ہے جس کا مقصد زائد بلنگ اور غلط میٹر ریڈنگ جیسے مسائل پر قابو پانا ہے۔ اس مہم کے تحت صارفین کو بااختیار بنانے کے لیے ڈیجیٹل ٹیکنالوجی کا مؤثر استعمال کیا جا رہا ہے۔

یہ منصوبہ “پاور اسمارٹ ایپ” کے ذریعے متعارف کرایا گیا ہے، جس کے تحت بجلی کے صارفین اپنی میٹر ریڈنگ خود جمع کرا سکتے ہیں۔ صارفین میٹر کی تصویر اپ لوڈ کر کے بلنگ میں ممکنہ غلطیوں، تاخیر اور تنازعات کے امکانات کو کم کر سکتے ہیں، جس سے ایک شفاف اور منصفانہ نظام تشکیل دیا جا رہا ہے۔

یہ بھی پڑھیں: عوام کیلئے خوشخبری : ملک بھر میں بجلی کی قیمت میں نمایاں کمی

ترجمان نے مزید بتایا کہ وفاقی وزیر نے آئندہ سال کو بجلی کے شعبے میں بہتر سروس اور صارفین کے اطمینان کا سال قرار دیا ہے، جو اس بات کی عکاسی کرتا ہے کہ حکومت صارفین کو سہولیات کی فراہمی میں مزید بہتری لانے کے لیے پرعزم ہے۔