خانپور کے قریب عوام ایکسپریس کی پٹڑی سے اتر گئی، مسافر پھنس گئے، ٹریک بند

پشاور سے کراچی جانے والی عوام ایکسپریس خانپور ریلوے اسٹیشن کے قریب پٹڑی سے اتر گئی۔ حادثے میں 2 بوگیاں ٹریک سے اتر گئیں، جس کی وجہ مبینہ طور پر پوائنٹس مین کی غفلت بتائی جا رہی ہے۔

یہ بھی پڑھیں:پنجاب حکومت کا اورنج ٹرین اورمیٹرو بس سے ٹوکن سسٹم ختم کرنے کا فیصلہ

میڈیا رپورٹ کے مطابق یہ واقعہ اُس وقت پیش آیا جب ٹرین چلتے ہوئے پوائنٹس مین نے اچانک ٹریک کا رخ تبدیل کر دیا، جس کے باعث ایک بوگی دوسرے ٹریک پر چلی گئی اور حادثہ پیش آیا۔

خوش قسمتی سے، ریلوے حکام نے تصدیق کی ہے کہ تمام مسافر محفوظ رہے اور کوئی جانی نقصان یا چوٹ رپورٹ نہیں ہوئی۔

حادثے کے بعد لائن نمبر 2 اور 3 کو بند کر دیا گیا، جس کے باعث نیچے جانے والی تمام ٹرینوں کی آمدورفت معطل ہو گئی۔ اس تعطل کے باعث مسافر شدید پریشانی کا شکار ہو گئے اور ان کے سفری منصوبے متاثر ہوئے۔

مزید پڑھیں؍پاکستان ریلویز اور حکومت بلوچستان کا کوئٹہ میں پیپلز ٹرین سروس شروع کرنے پر اتفاق

ریلوے حکام فوری طور پر موقع پر پہنچے اور امدادی و بحالی کے کام کا آغاز کر دیا۔ حکام کے مطابق ٹریک کو مکمل طور پر بحال کرنے میں 3 سے 4 گھنٹے لگ سکتے ہیں۔

ذرائع کا کہنا ہے کہ حادثہ پوائنٹس مین کی مبینہ غفلت کے باعث پیش آیا، جس نے ٹرین کے چلتے وقت ٹریک تبدیل کر دیا۔

انتظامیہ نے یقین دلایا ہے کہ چند گھنٹوں میں ریلوے آپریشن دوبارہ شروع کر دیا جائے گا۔ حادثے کی تحقیقات بھی جلد متوقع ہیں۔