محکمہ موسمیات نے طوفانی بارشوں کی پیشگوئی کردی

اسلام آباد۔ محکمہ موسمیات نے کراچی، اسلام آباد سمیت ملک کے مختلف حصوں میں گرج چمک کے ساتھ شدید بارشوں کی پیشگوئی کر دی ہے۔ تازہ ترین ایڈوائزری کے مطابق بحیرہ عرب سے آنے والے مون سون کے جھکڑ پاکستان کے بالائی علاقوں میں مسلسل داخل ہو رہے ہیں جبکہ خلیج بنگال سے آنے والی مرطوب ہوائیں ہفتے کے وسط میں مزید طاقتور ہونے کا امکان ہے۔

محکمہ موسمیات کے مطابق 14 سے 17 اگست کے دوران اسلام آباد، آزاد جموں و کشمیر، بالائی پنجاب، خیبر پختونخوا اور گلگت بلتستان میں بارش، ہوا اور گرج چمک کے ساتھ بعض مقامات پر موسلا دھار بارش ہو گی۔ 18 سے 21 اگست کے دوران شمالی علاقوں، بشمول وادی نیلم، مظفرآباد، راولا کوٹ، پونچھ اور گلگت بلتستان کے مختلف اضلاع میں بارشوں کا سلسلہ جاری رہے گا۔

اسی دوران خیبر پختونخوا کے اضلاع دیر، سوات، مانسہرہ، ایبٹ آباد، پشاور اور مردان میں بھی وسیع پیمانے پر بارشیں ہوں گی، جن میں بعض مقامات پر شدید سے بہت شدید بارش کا امکان ہے۔ جنوبی اضلاع بنوں، لکی مروت، وزیرستان، ٹانک اور ڈیرہ اسماعیل خان میں وقفے وقفے سے ہلکی اور کہیں کہیں تیز بارش متوقع ہے۔

پنجاب میں، بشمول اسلام آباد/راولپنڈی، مری، گلیات، لاہور، گوجرانوالہ، سیالکوٹ اور فیصل آباد میں 18 سے 21 اگست کے دوران موسلا دھار بارشوں کا امکان ہے، جبکہ جنوبی اضلاع میں ہلکی سے درمیانی بارش ہو گی۔ بلوچستان کے بارکھان، ژوب، خضدار، گوادر اور پنجگور، اور سندھ کے کراچی، حیدرآباد، سکھر، لاڑکانہ اور تھرپارکر سمیت کئی اضلاع میں 18 سے 22 اگست کے دوران بارشیں متوقع ہیں۔

یہ بھی پڑھیں: بھگوڑا احمد نورانی ذہنی طور پر معذور، امریکا کیوں گیا؟ فیاض الحسن چوہان کے حیران کن انکشافات

محکمہ موسمیات نے خبردار کیا ہے کہ 15 سے 21 اگست کے دوران خیبر پختونخوا، مری، گلیات، شمال مشرقی پنجاب اور آزاد کشمیر کے مقامی ندی نالوں میں اچانک طغیانی آسکتی ہے۔ 18 سے 21 اگست کے دوران ڈیرہ غازی خان اور مشرقی بلوچستان میں پہاڑی سلسلوں سے آنے والے ریلوں کا خطرہ ہے۔ اسلام آباد/راولپنڈی، گوجرانوالہ، لاہور، سیالکوٹ، پشاور اور نوشہرہ کے نشیبی علاقوں میں اربن فلڈنگ کا خدشہ ہے۔

مزید برآں، خیبر پختونخوا، گلگت بلتستان، مری، گلیات اور آزاد کشمیر کے پہاڑی علاقوں میں لینڈ سلائیڈنگ سے سڑکیں بند ہونے کا امکان ہے، جبکہ موسلا دھار بارش، تیز آندھی اور بجلی گرنے سے کمزور ڈھانچوں جیسے کچے مکانات، بجلی کے کھمبے، اشتہاری بورڈز، گاڑیاں اور سولر پینلز کو نقصان پہنچ سکتا ہے۔

عوام، مسافروں اور سیاحوں کو ہدایت کی گئی ہے کہ وہ غیر ضروری طور پر حساس علاقوں کا سفر نہ کریں اور موسم کی تازہ ترین صورتحال سے باخبر رہیں۔ متعلقہ اداروں کو بھی کسی ناخوشگوار صورتحال سے بچنے کے لیے ہائی الرٹ رہنے کی ہدایت دی گئی ہے۔