وفاقی دارالحکومت اسلام آباد راولپنڈی سمیت ملک کے بیشتر علاقوں میں آج بارش کا امکان ہے۔
ذرائع کے مطابق چاروں صوبوں سمیت آزاد کشمیر اور گلگت بلتستان کے ندی نالوں میں طغیانی، لینڈ سلائیڈنگ اور نشیبی علاقے زیر آب آنے کا خدشہ ہے۔
این ڈی ایم اے نے بھی متعلقہ اداروں کو الرٹ رہنے کی ہدایت کی ہے۔
اس کے علاوہ سندھ کے کئی شہروں میں بھی گرج چمک کے ساتھ بارش کی توقع ہے، بلوچستان کے کچھ اضلاع میں بھی موسلادھار بارش کا امکان ظاہر کیا گیا ہے۔
پشاور سمیت خیبرپختونخوا کے بیشتر اضلاع میں وقفے وقفے سے بارشوں کا سلسلہ جاری جاری ہے، صوبائی دارالحکومت میں بارش سے کئی علاقے زیرآب رہے جس کے باعث ٹریفک کی روانی بھی متاثر ہوئی ہے۔
محکمہ موسمیات نے بتایا کہ پشاور اس وقت بھی بادلوں کی لپیٹ میں ہے اور مزید بارشوں کا امکان ہے۔
ادھر شہر قائد میں گرمی اور حبس سے ستائے شہریوں کے لیے آج صبح بارش خوشگوار پیغام لے آئی، کراچی کے مختلف علاقوں میں رم جھم کا سلسلہ جاری ہے، جس سے موسم نہ صرف خوشگوار ہو گیا بلکہ شہریوں نے بھی سکھ کا سانس لیا۔
کلفٹن، ڈیفنس، قیوم آباد اور شارع فیصل سمیت کئی علاقوں میں ہلکی سے درمیانے درجے کی بارش ہوئی، جبکہ گلستان جوہر، گلشن اقبال، فیڈرل بی ایریا، اسکیم 33 اور صفورا چورنگی میں بھی بادل برس پڑے۔
نارتھ کراچی، اولڈ سٹی ایریا، گلستان جوہر اور ناظم آباد میں تیز بارش جاری ہے، کلفٹن، جامعتہ الرشید احسن آباد، گلشن معمار، دستگیر، فیڈرل بی ایریا بلاک 16، حسن اسکوائر، یونیورسٹی روڈ، احسن آباد اور سرجانی میں بھی کہیں ہلکی کہیں تیز بارش کا سلسلہ جاری ہے۔
By 
