اسحاق ڈار کی امیر جماعت اسلامی بنگلہ دیش سے ملاقات،باہمی تعلقات اور خطے کی صورتحال پر گفتگو

نائب وزیراعظم و وزیر خارجہ سینیٹر اسحاق ڈار نے اپنے دورۂ بنگلہ دیش کے دوران امیر جماعتِ اسلامی بنگلہ دیش ڈاکٹر شفیق الرحمٰن سے ان کی رہائش گاہ پر ملاقات کی اور وزیراعظم شہباز شریف کی جانب سے صحت و سلامتی کے لیے نیک خواہشات کا پیغام پہنچایا۔

ترجمان دفتر خارجہ کے مطابق ڈاکٹر شفیق الرحمٰن حال ہی میں دل کے آپریشن کے بعد صحت یاب ہو رہے ہیں، اس موقع پر اسحاق ڈار نے وزیراعظم پاکستان اور اپنی جانب سے ان کی جلد مکمل صحتیابی اور درازیٔ عمر کے لیے نیک تمناؤں کا اظہار کیا۔

نائب وزیراعظم نے ڈاکٹر شفیق الرحمٰن کی سیاست، تعلیم اور سماجی بہبود کے میدانوں میں خدمات کو سراہتے ہوئے کہا کہ ان کی قیادت کا کردار بنگلہ دیشی عوام کے لیے باعثِ رہنمائی ہے۔

Deputy Prime Minister and Foreign Minister, Senator Mohammad Ishaq Dar @MIshaqDar50, visited the residence of Ameer, Bangladesh Jamaat-e-Islami ,Dr. Shafiqur Rahman, who is convalescing after a cardiac surgery. On behalf of the Prime Minister of Pakistan and his own behalf , he… pic.twitter.com/bBy0FoPHi3

— Ministry of Foreign Affairs – Pakistan (@ForeignOfficePk) August 24, 2025

واضح رہے کہ اس سے قبل ڈھاکا میں اسحاق ڈار سے جماعت اسلامی بنگلہ دیش کے وفد نے بھی ملاقات کی تھی، جس کی قیادت نائب امیر ڈاکٹر سید عبداللہ محمد طاہر کر رہے تھے، ملاقات میں پاکستان اور بنگلہ دیش کے تعلقات کو مزید مضبوط بنانے کے پہلوؤں اور خطے کی موجودہ صورتحال پر تفصیلی تبادلہ خیال کیا گیا۔

نائب وزیراعظم نے جماعت اسلامی کی قیادت اور کارکنان کے حوصلے اور ثابت قدمی کو خراج تحسین پیش کیا اور امید ظاہر کی کہ دونوں ممالک مستقبل میں تعلقات کو مزید وسعت دیں گے۔