بھارت: یامنا دریا میں پانی کی سطح بلند، دہلی میں سیلاب کا خطرہ، الرٹ جاری

بھارت کے مقامی اخبار کی ’’دی ٹریبیون ‘‘ کی رپورٹ کے مطابق ہفتہ کی صبح 9 بجے تک دہلی میں پرانے ریلوے پل پر یامنا دریا کا پانی 205.22 میٹر تک پہنچ گیا جو خطرے کے نشان 205.33 میٹر کے قریب ہے۔

اہلکار کے مطابق صورتحال پر قریبی نظر رکھی جا رہی ہے اور تمام متعلقہ ایجنسیوں کو ہدایت دی گئی ہے کہ سیلاب جیسی صورتحال سے نمٹنے کے لیے احتیاطی تدابیر اختیار کریں، کیونکہ پانی کی سطح مزید بڑھنے کی پیش گوئی کی گئی ہے۔

مرکزی فلڈ روم کے ایک اہلکار نے مذکورہ اخبار کو بتایا کہ “دریا میں پانی کا بڑھنا زیادہ تر وجہ ہے کہ وزیرآباد اور ہتھنی کنڈ بیراج سے ہر گھنٹے بڑی مقدار میں پانی چھوڑا جا رہا ہے۔”

فلڈ کنٹرول ڈیپارٹمنٹ کے مطابق ہتھنی کنڈ بیراج سے ہر گھنٹے تقریباً 46,968 کیوسک اور وزیرآباد سے 44,970 کیوسک پانی چھوڑا جا رہا ہے۔

پرانا ریلوے پل دریا کے بہاؤ اور ممکنہ سیلاب کے خطرات کی نگرانی کے لیے ایک اہم مقام سمجھا جاتا ہے۔

یہ بھی پڑھیں: بھارتی انتخابات سے قبل ’را ‘ کا پاکستان مخالف پروپیگنڈا تیز، نیا جھوٹا ڈراما اور بیانیہ بے نقاب

شہر کے لیے وارننگ کا نشان 204.50 میٹر ہے، جبکہ خطرے کا نشان 205.33 میٹر ہے اور لوگوں کی نقل مکانی 206 میٹر پر شروع ہوتی ہے۔

بیراجوں سے چھوڑا گیا پانی عموماً دہلی پہنچنے میں 48 سے 50 گھنٹے لیتا ہے۔ یہاں تک کہ اوپری علاقوں سے کم مقدار میں پانی چھوڑنے سے بھی شہر میں پانی کی سطح بڑھ کر وارننگ کے نشان کے قریب پہنچ رہی ہے۔