ورلڈ بینک کا پاکستان کو 2 ارب ڈالر سے زیادہ قرض دینے کا اعلان

ورلڈ بینک موجودہ مالی سال کے دوران پاکستان کو2 ارب ڈالر سے زیادہ قرض فراہم کرے گا۔ یہ انکشاف اقتصادی امورڈویژن کی جانب سے جاری کردہ سرکاری دستاویزات میں کیا گیا ہے۔

یہ فنڈنگ انٹرنیشنل ڈویلپمنٹ ایسوسی ایشن (آئی ڈی اے) اور انٹرنیشنل بینک فار ریکنسٹرکشن اینڈ ڈیولپمنٹ (آئی بی آر ڈی) کے ذریعے فراہم کی جائے گی، جس کا مقصد زراعت، توانائی، پانی، مالیات، محصولات، طرزِ حکمرانی، اور سماجی خدمات کے شعبوں میں منصوبوں کو سہارا دینا ہے۔

یہ بھی پڑھیں:ورلڈ بینک کی جانب سے طلبا، طالبات اور اساتذہ کے لیے بڑی خوشخبری

اس وقت ملک بھر میں ورلڈ بینک کے تعاون سے 57 منصوبے جاری ہیں، جن کی مجموعی مالیت 16.6 ارب ڈالر ہے۔ یہ منصوبے مواصلات، دیہی و شہری ترقی، انسانی سرمایہ کاری اور اصلاحاتِ حکمرانی جیسے شعبوں کا احاطہ کرتے ہیں۔

ورلڈ بینک نے آنے والے سالوں میں 8.6 ارب ڈالر کے مزید منصوبوں کے لیے بھی وعدہ کیا ہے، جو پاکستان کی ترقیاتی حکمتِ عملی کے تسلسل کو ظاہر کرتا ہے۔

فنڈنگ کے رجحانات اور ترجیحی شعبے

گزشتہ سات برسوں میں پاکستان کو ورلڈ بینک سے مجموعی طور پر 11.84 ارب ڈالر کے قرضے موصول ہوئے، جن میں سب سے زیادہ فنڈنگ توانائی کے شعبے کو ملی، جو 1.96 ارب ڈالر رہی۔

ہر مالی سال میں موصول ہونے والی رقم 25-2024 کے لیے1.80  ارب ڈالر(متوقع)، 2023-24، 2.24 ارب ڈالر، 2022-23 میں 2.12 ارب ڈالر، 2021-22 میں 1.59  ارب ڈالر، 2020-21 میں  2.00 ارب ڈالر،2019-20 میں1.37 ارب ڈالرفراہم کیے گئے۔

مزید پڑھیں:پاکستان کو بھارت کی طرف سے معاہدے کی معطلی پر ورلڈ بینک سے ریلیف مل جائے گا: سابق ایڈیشنل کمشنر سندھ طاس معاہدہ

یہ مالی معاونت پاکستان کی اقتصادی اور ادارہ جاتی اصلاحات کے لیے ورلڈ بینک کے طویل مدتی عزم کا اظہار ہے، خاص طور پر ایسے وقت میں جب ملک کو مالی مشکلات اور ترقیاتی چیلنجز کا سامنا ہے۔