ومبلڈن ٹینس، تاریخ کا بڑا اپ سیٹ، دفاعی چیمپیئن ایونٹ سے باہر

لندن میں جاری ومبلڈن ٹینس ٹورنامنٹ کے ویمنز سنگلز کے تیسرے راؤنڈ (راؤنڈ آف 32) میں اس وقت ایک بڑا اپ سیٹ دیکھنے کو آیا جب فلپائن کی غیر معروف ٹینس اسٹار الیگزینڈرا ایلا نے شاندار کارکردگی کا مظاہرہ کرتے ہوئے دفاعی چیمپیئن اور نمبر 3 سیڈڈ پولینڈ کی ایگا شواٹک کو اسٹریٹ سیٹس میں شکست دے کر ٹورنامنٹ سے باہر کر دیا اور پری کوارٹر فائنل میں اپنی جگہ پکی کر لی۔

ٹینس کی دنیا کے سب سے معتبر ایونٹ ومبلڈن ٹینس ٹورنامنٹ میں سنسنی خیز مقابلوں کا سلسلہ جاری ہے، جہاں ویمنز سنگلز کے تیسرے راؤنڈ میں ٹینس شائقین کو اس وقت شدید جھٹکا لگا جب ٹائٹل کے لیے ہاٹ فیورٹ اور دفاعی چیمپیئن پولینڈ کی ایگا شواٹک فلپائن کی ابھرتی ہوئی کھلاڑی الیگزینڈرا ایلا کے ہاتھوں اپ سیٹ شکست کا شکار ہو گئیں۔

یہ بھی پڑھیں:معروف آسٹریلین ٹینس لیجنڈ مال اینڈرسن 91 برس کی عمر میں چل بسے

راؤنڈ آف 32 کے اس انتہائی اعصاب شکن مقابلے میں فلپائنی کھلاڑی نے شروع سے ہی دفاعی چیمپئن پر دباؤ برقرار رکھا اور شاندار کھیل پیش کرتے ہوئے فتح اپنے نام کی۔

مقابلے کی تفصیلات اور سنسنی خیز ٹائی بریکر

اس اہم میچ کے پہلے سیٹ میں دونوں کھلاڑیوں کے درمیان کانٹے کا مقابلہ دیکھنے کو ملا۔ کھیل ٹائی بریکر تک جا پہنچا، جہاں الیگزینڈرا ایلا نے غیر معمولی اعصاب کا مظاہرہ کرتے ہوئے 9 کے مقابلے میں 11 پوائنٹس حاصل کیے اور پہلا سیٹ اپنے نام کر کے سب کو حیران کر دیا۔

 پہلے سیٹ کی اس نفسیاتی برتری کا فائدہ ایلا نے دوسرے سیٹ میں بھرپور انداز میں اٹھایا۔ انہوں نے دوسرے سیٹ میں دفاعی چیمپیئن ایگا شواٹک کو کھیل کے کسی شعبے میں سنبھلنے کا موقع نہ دیا اور یہ سیٹ یکطرفہ مقابلے کے بعد 2-6 سے جیت کر نہ صرف میچ اپنے نام کیا بلکہ پولش اسٹار کا ومبلڈن کا سفر بھی تمام کر دیا۔

ایلکس ڈی مینوار کی سخت مقابلے کے بعد کامیابی

دوسری جانب مینز سنگلز کے مقابلوں میں بھی زبردست ٹینس دیکھنے کو ملی۔ آسٹریلیا سے تعلق رکھنے والے نمبر 5 سیڈڈ ٹینس اسٹار ایلکس ڈی مینوار نے اپنے امریکی حریف زیچری کے خلاف ایک طویل اور اعصاب شکن مقابلے کے بعد کامیابی حاصل کر لی۔

ایلکس ڈی مینوار نے امریکی کھلاڑی کے خلاف پہلے سیٹ میں 2-6 سے کامیابی حاصل کی، تاہم امریکی کھلاڑی نے کم بیک کرتے ہوئے دوسرا سیٹ 7-5 سے جیت لیا۔ اس کے بعد ایلکس نے دوبارہ کھیل پر گرفت مضبوط کی اور بقیہ سیٹس 2-6 اور 4-6 سے جیت کر پری کوارٹر فائنل کے لیے کوالیفائی کر لیا۔

مزید پڑھیں:ٹینس بال سے ورلڈ کپ تک، عثمان طارق کی حیران کن کہانی، ہیڈ بینڈ بھی بن گیا پہچان

پولینڈ کی ایگا شواٹک کا شمار موجودہ دور کی دنیا کی بہترین ٹینس کھلاڑیوں میں ہوتا ہے اور وہ ومبلڈن کی دفاعی چیمپئن کے طور پر میدان میں اتری تھیں۔

ان کی حالیہ فارم کو دیکھتے ہوئے یہ توقع کی جا رہی تھی کہ وہ باآسانی اگلے راؤنڈز میں جگہ بنا لیں گی، لیکن گراس کورٹ پر فلپائن کی الیگزینڈرا ایلا نے ان کی تمام تر حکمت عملی کو ناکام بنا دیا۔

فلپائنی ٹینس کے لیے الیگزینڈرا ایلا کی یہ کامیابی ایک تاریخی سنگِ میل کی حیثیت رکھتی ہے کیونکہ کسی فلپائنی کھلاڑی کا عالمی نمبر 3 اور دفاعی چیمپئن کو شکست دینا ایک غیر معمولی واقعہ ہے۔