پاکستان میں انٹرنیٹ کی رفتار میں کمی، پی ٹی سی ایل نے وجہ بتا دی

پاکستان بھر میں انٹرنیٹ صارفین کو سست رفتار کا سامنا ہے، جس کی وجہ سعودی عرب کے شہر جدہ کے قریب 2 بڑی سب میرین کیبلز میں خرابی بتائی گئی ہے۔

پاکستان ٹیلی کمیونیکیشن کمپنی لمیٹڈ (پی ٹی سی ایل) نے ہفتے کو اس مسئلے کی تصدیق کی اور بتایا کہ ’ایس ایم ڈبلیو۔4 ساؤتھ ایسٹ ایشیا۔مڈل ایسٹ، ویسٹرن یورپ۔4 اور انڈیا مڈل ایسٹ’ آئی ایم ای ڈبلیو ای، ویسٹرن یورپ کیبل سسمٹز متاثر ہوئے ہیں۔

یہ بھی دیکھیں:پی ٹی سی ایل کا سب میرین کیبل کی خرابی سے متاثر انٹرنیٹ سروسز بحال کرنے کا دعویٰ

پی ٹی سی ایل کے ترجمان کے مطابق ان کیبلز میں خرابی کی وجہ سے بینڈوڈتھ کی صلاحیت جزوی طور پر متاثر ہوئی ہے، جس کے نتیجے میں خاص طور پر شام کے اوقات میں انٹرنیٹ کی رفتار میں کمی دیکھی جا رہی ہے۔ صارفین نے ویب براؤزنگ، اسٹریمنگ اور ڈاؤن لوڈنگ میں سستی کی شکایات کی ہیں۔

pic.twitter.com/1bNQhn9cjc

— PTCL (@PTCLOfficial) September 6, 2025

پی ٹی سی ایل کا کہنا ہے کہ اس کے بین الاقوامی شراکت دار اس مسئلے کو ترجیحی بنیادوں پر حل کرنے میں مصروف ہیں، جبکہ مقامی ٹیمیں متبادل بینڈوڈتھ کا انتظام کر رہی ہیں تاکہ ملک بھر میں انٹرنیٹ سروسز جاری رکھی جا سکیں۔

پی ٹی سی ایل گروپ کے ترجمان نے کہا کہ ’ہم اپنے صارفین کے صبر کے شکر گزار ہیں‘۔ ’سب میرین کیبل میں خرابی کے اثرات کو کم سے کم کرنے کی بھرپور کوشش کی جا رہی ہے۔ ہمیں امید ہے کہ مرمت مکمل ہوتے ہی انٹرنیٹ سروس معمول پر آ جائے گی‘۔

مزید پڑھیں:عالمی سب میرین کیبل میں خرابی سے پاکستان میں انٹرنیٹ سروس تاحال متاثر

اگرچہ مرمت کی تکمیل کے لیے کوئی حتمی وقت نہیں دیا گیا، لیکن پی ٹی سی ایل نے یقین دہانی کرائی ہے کہ انٹرنیٹ کی سروسز کی بحالی اس کی اولین ترجیح ہے۔