صبا قمر کی نئی ڈراما سیریل کا ٹریلر جاری، سوشل میڈیا پر دھوم

صبا قمر کی نئی ڈراما سیریل ’کیس نمبر۔9 ‘کا ٹریلر ریلیز کر دیا گیا ہے، جس نے سوشل میڈیا پر دھوم مچا دی ہے۔ یہ قانونی معاملات پر سنجیدہ نوعیت کا ایک پروفیشنل ڈراما سیریل ہے جسے نجی ٹی وی چینل ’جیو‘ انٹرٹینمنٹ پر جاری کیا جائے گا اس میں معاشرتی مسائل کو جرات مندی سے اجاگر کیا گیا ہے۔

ڈرامے میں صبا قمر ’سحر معظّم‘ کے نام سے کردار نبھا رہی ہیں، جو ایک ریپ سروائیور ہیں اور انصاف کے لیے ایک ایسے نظام سے لڑ رہی ہے جو مظلوم کو ہی کٹہرے میں لا کھڑا کرتا ہے۔ ٹریلر میں صبا قمر کی جذبات سے بھرپور پرفارمنس دیکھنے کو ملتی ہے، جو اپنے جرات مند کرداروں کے لیے جانی جاتی ہیں۔

یہ بھی پڑھیں:پہلگام واقعہ، ڈراما بازی یا مودی سرکار کی سازش، سابق بھارتی وزیر خارجہ یشونت سنہا نے بڑا انکشاف کردیا

فیصل قریشی ڈرامے میں ملزم کا کردار ادا کر رہے ہیں، جب کہ گوہر رشید کو ایک مشکوک پولیس والے کے کردار میں دکھایا گیا ہے۔ آمنہ شیخ ’سحر معظم‘ کی وکیل کے طور پر عدالت میں اس کا مقدمہ لڑتی نظر آئیں گی۔

اس کے علاوہ ڈرامے کی اسٹار کاسٹ میں جنید خان، روشنا خان، حنا خواجہ بیات، نور الحسن، نوین وقار، عذرا محی الدین، علی رحمان خان، شہنواز زیدی، احمد رندھاوا، زہرہ امیر، مزنا وقاص، کامران جیلانی اور فائزہ گیلانی شامل ہیں۔

yes geo we need more dramas like this one. all love to queen saba qamar for always going for such powerful roles and using her platform the right way. 👏👏 #caseno9 pic.twitter.com/9DSScO7xfy

— t a n i 🧋 (@adhdptsdkid) September 5, 2025

ڈرامے کی کہانی معروف صحافی شہزاد خانزادہ نے تحریر کی ہے۔ اگرچہ ٹریلر سے مکمل کہانی کا اندازہ لگانا مشکل ہے، لیکن یہ واضح ہے کہ ڈراما ایک حساس اور اہم مسئلے پر گہری روشنی ڈالے گا۔

ٹریلر میں صبا قمر کی ایک دل چھو لینے والی لائن نے ناظرین کو خاصا متاثر کیا کہ ’ عورتیں یہ کیسز ثبوت کی کمی کی وجہ سے نہیں، حوصلے کی کمی کی وجہ سے ہارتی ہیں‘۔

یہ مکالمہ اس وقت سنایا گیا جب وہ زمین پر بے بسی کی حالت میں لیٹی ہوئی ہیں، ایک علامتی منظر جو ان مشکلات کی نمائندگی کرتا ہے جن کا سامنا ایک مظلوم عورت کو کرنا پڑتا ہے۔

مزید پڑھیں:آزاد ڈیجیٹل کی خصوصی دعوت پر ارطغرل غازی ڈراما سیریل کے اہم کردار عثمان بے کی پاکستان آمد

عدالت کے مناظر بھی بہت طاقتور ہیں، خاص طور پر وہ لمحہ جب سحرمعظم ایک وکیل (نور الحسن) سے کہتی ہیں کہ ’ تمہیں شرم آنی چاہیے، کیا تمہارے گھر ماں بہن نہیں ہے؟‘۔

جس پر وہ وکیل طنزیہ لہجے میں جواب دیتا ہے کہ ’ بالکل ہیں، لیکن وہ تم جیسی نہیں ہیں‘۔

ڈراما سیریل ’کیس نمبر۔9 ‘کو عبداللہ کادوانی اور اسد قریشی نے پروڈیوس کیا ہے، جبکہ ہدایت کاری سید وجاہت حسین نے کی ہے۔ اس ڈرامے کو پاکستانی ٹی وی کی تاریخ میں ایک جرات مندانہ قدم قرار دیا جا رہا ہے، جو نہ صرف ناظرین کو جھنجھوڑے گا بلکہ اہم معاشرتی مکالمے کو بھی جنم دے گا۔

اگرچہ ابھی اس کی نشر ہونے کی تاریخ کا اعلان نہیں ہوا، لیکن ٹریلر نے جو اثر چھوڑا ہے، اس کے بعد شائقین اور ناقدین دونوں ہی اس ڈرامے کا بے صبری سے انتظار کر رہے ہیں۔